भन्सार जाँचपासमा संलग्न अधिकृत चन्द र नासु ढकाललाई निलम्बनको तयारी
भन्सार विभागले भन्सार जाँचपासमा खटिएका दुई कर्मचारीलाई निलम्बनको तयारी गरेको छ । झण्डै एक सय किलो सुनलाई भन्सार विभाग जाँचपास भइ बाहिरिने क्रममा राजस्व अनुसन्धान विभागले एकै पटक सुन बरामद गरेको थियो ।
Advertisement 1
अध्यागमन र प्रहरीबाटसमेत सुन पास गरेर अघि बढिसकेको अवस्थामा विभागले नियन्त्रणमा लिएको हो । सुन हङकङबाट ल्याइएको खुलेको छ । सुन ओसारपसारमा संलग्न रहेका ट्याक्सी चालकसहित ६ जनालाई पक्राउ गरिएको छ । दिलिप भुजेल, रामकुमार भुजेल, भन्सार एजेन्ट राजेन्द्र राई ट्याक्सी चालक र थप दुई जनासमेत गए राति नै पक्राउ परेको राजश्व अनुसन्धान स्रोतले जनाएको छ ।
यो प्रकरणमा भन्सार र अध्यागमनका कर्मचारीहरु समेत मुछिएका छन् । भन्सार जाँचपास गर्ने क्रममा शाखा अधिकृत सन्तोष चन्द र नायब सुब्बा कुमार ढकाल खटिएका थिए यी दुबैलाई जिम्मेवारीबाट हटाएर अनुसन्धान गर्न लागिएको भन्सार विभागले जनाएको छ ।
Advertisement 2
विमानस्थल भन्सार स्रोतका अनुसार पैठारीकर्ताले आफ्नो विवरण उल्लेख गरी कार्गोमार्फत् ती सामान नेपाल ल्याएका थिए । कार्गोमार्फत् नेपाल आएको सामान विमानस्थलको कार्गोबाट सोझै भन्सार कार्यालयको गोदाममा आउने गर्छ ।
गोदामबाट जाँचपास गरेपछि मात्रै ती सामान बाहिर ल्याउन पाइन्छ । यतिबेला त्रिभुवन विमानस्थल भन्सार कार्यालयको प्रमुखको जिम्मेवारी अरुण पोखरेलसँग छ । उनी दुई महिनादेखि बिरामी बिदामा छन् । उनको स्थानमा निमित्त कार्यालय प्रमुखका रुपमा नारद गौतम रहेका छन् ।
Advertisement 3
यसैबीच,भन्सार विभागले विमानस्थल भन्सार जाँचपासमा संलग्नता रहेकोहरुको बारेमा बुझ्न छानबिन समिति बनाएको छ । विभागको अनुसन्धान शाखाका निर्देशक मानबहादुर पौडेलको नेतृत्वमा छानबिन समिति गठन भएको छ ।
उता सय किलो सुन बरामद प्रकरणमा सोधपुछका लागि गृहमन्त्री नारायणकाजी श्रेष्ठले भन्सार विभागका महानिर्देशक शोभाकान्त पौडेललाई अहिले सोधपुछका लागि मन्त्रालयमा बोलाएका छन् ।
