बढुवा खानकै लागि दरबन्दी दुर्गममा राख्ने तर शक्तिकेन्द्र लगाएर सुगम त्यसमा पनि शहरी क्षेत्रमा अझैं मालदार अड्डातिर कार्यरत कर्मचारीहरुको बिगबिगी छ,निजामती क्षेत्रमा ।

Advertisement 1

पहुँचका भरमा दुर्गममा दरबन्दी कायम गरेर सुगम क्षेत्रमा कार्यरत रहने कर्मचारीभित्र पर्दछन् शोभाखर रेग्मी । नक्कली भुटानी शरणार्थी प्रकरणमा कारागार पुगेका बालकृष्ण खाँण गृहमन्त्री र टेकनारायण पाण्डे सचिव हुँदा गृहका कर्मचारी प्रशासनका हर्ताकर्ता थिए उनी । गृहका सहसचिवलाई बरण्डामा राखेर रामेछापको सिडिओ खान गए । ६ महिनापछि नै अछाममा सहायक सिडिओ भए । बढुवा खानका लागि दुर्गम दरबन्दी राखेर अहिले काजमा उपप्रधानमन्त्री तथा रक्षामन्त्री पूर्णबहादुर खड्काको निजी सचिव तोकिएका छन् । यसरी दुर्गममा दरबन्दी राखेर सुगममा बस्ने गरी गंगाबहादुर क्षेत्रीले पनि लाइन मिलाएका छन् । गृहस्रोतका अनुसार दरबन्दी जाजरकोटमा भए पनि अहिले कास्कीको सहायक सिडिओ छन् । गृहकै उपसचिव लीला केसीको दरबन्दी पाँचथरमा छ तर काठमाडौंको विपद व्यवस्थापनमा छिन्, काजमा ।
यस्ता कर्मचारीको सूची निकै लामो भेटिन्छ,खोज्दै जाने हो भने । गृहकै तीन पावरफुल सुब्बाहरुको दरबन्दी एकातिर छ तर काजमा कार्यरत छन्,अध्यामगनतिर ।

ती सुव्वात्रय हुन टंकनाथ गौतम, राजीव महत्तो र प्रभातकुमार मल्लिक । अध्यागमनका बहादुर सुब्बाद्धय हुन टंकनाथ गौतमको सरुवा मन्त्रालयमा गरिएको भए पनि उनी त्यहाँबाट सरुवा हुन परेको छैन । उनी स्टोरको हर्ताकर्ता भएर बसिरहेका छन । यस्तै राजीव महत्तो पनि सरुवा भएको ठाउँमा नगइ रमाना नलिइ अध्यागमनमै बस्ने अटेरी कर्मचारीभित्र पर्दछन् । सिन्धुपाल्चोक जिल्ला प्रशासन कार्यालय दरबन्दी भएपनि कम्प्युटर अपरेट महतो करिब एक बर्ष अघि देखि अध्यागमन विभागमा काजमा कार्यरत छन् । ०७८ वैशाख देखि जिल्ला प्रशासन कार्यालय सिन्धपाल्चोकमा दरबन्दी रहेका महतोको २०७८ भदौ ११ गते राष्ट्रिय विपद् जोखिम न्यूनीकरण तथा व्यवस्थापन प्राधिकरणमा काज सरुवा भएको थियो भने २०७८ चैत १४ को निर्णयानुसार पुन काजमा नै अध्यागमन विभागमा कार्यरत रहेका छन् । यस्तै कम्युटर अपरेटर प्रभातकुमार मल्लिक काठमाडौं बाहिर दरबन्दी भए पनि अध्यागनमा लामो समय कार्यरत रहे । इलाका प्रशासन गोटिखेल,उच्च अदालत पाटन,अध्यागमन कार्यालय पोखरामा दरबन्दी हुँदा समेत उनी लामो समय त्रिभुवन अन्तर्राष्ट्रिय विमानस्थलस्थित अध्यागमनमै डेरा जमाएर बसेका थिए । अहिले पोखरामा दरबन्दी राखेर नख्खु कारागारमा कार्यरत छन् ।
यस्तो भद्रगोल हरेक मन्त्रालयमा भेटिन्छ ।

Advertisement 2

त्यही कारण त अधिकांश मन्त्रालयले कर्मचारीको दरबन्दी र काज विवरणको सूचना दिन खोज्दैनन् ।

यस्तै स्वास्थ्यमा पनि देखिन्छ डा दिलिपकुमार साहको दरबन्दी बाजुराको कोल्टीस्थित प्राथमिक स्वास्थ्य केन्द्रमा छ । एक जना चिकित्सकको मात्र दरबन्दी रहेको उक्त केन्द्र दुई वर्षदेखि डाक्टरविहीन छ । डा साह राजधानीमा एमडी अध्ययनरत छन् ।

स्वास्थ्य तथा जनसंख्या मन्त्रालयका अनुसार २०७५ सालदेखि हालसम्म ८९१ कर्मचारी काजमा शहरकेन्द्रित पालिकामा कार्यरत छन् । उनीहरूको दरबन्दी भने दुर्गम क्षेत्रमा छ । सुर्खेतको वीरेन्द्रनगर नगरपालिकामा ३८ जनाको मात्रै स्वीकृत दरबन्दी छ । थप ५१ जना कर्मचारी काजमा छन् । रूपन्देहीको तिलोत्तमा नगरपालिकामा ४५ जनाको दरबन्दी रहेकोमा थप ३२ जना कर्मचारी काजमा छन् । यस्तै धनगढी उपमहानगरपालिकामा १८ जनाको दरबन्दी रहेकोमा थप १६ जना काजका कर्मचारी छन् । काजमा कर्मचारी बढी रहनेमा कञ्चनपुरको भीमदत्त, बाँकेको कोहलपुर, हेटौंडा लगायत स्थानीय तह छन् ।

दुर्गममा सेवा गरे वापत बढुवाका लागि बढी अंक प्राप्त हुने प्रावधान रहेको कारण दुगर्ममा दरबन्दी राखेर सुगममा काम गर्न कर्मचारीहरुको बोलबोला बढ्दै गएको छ ।

केही साता अघि संघीय मामिला तथा सामान्य प्रशासन मन्त्री अमनलाल मोदीले समेत रमाना नलिने कर्मचारीलाई कारवाही गर्ने मात्र बताएनन कि कर्मचारीको सरुवा व्यवस्थापन संघीय मामिला तथा सामान्य प्रशासन मन्त्रालयले कर्मचारी प्रशासन महाशाखा हेर्ने सहसचिव हेमराज तामाङ र स्थानीय तह तथा क्षमता विकास महाशाखा प्रमुख सहसचिव बलराम रिज्याल सम्मिलित कार्यदल गठन गरेका भए पनि हरेक मन्त्रालय,निकायमा रहेका यस्ता जब्बर कर्मचारीलाई कानुनी दायरामा ल्याएर कारवाही गर्न सकेका छैनन् ।