स्थायी सरकारको रुपमा चिनिने निजामती प्रशासन राजनीतिक हस्तक्षेपका कारण क्रमशः ध्वस्त हुन थालेको छ । गुण र दोषका आधारमा पुरस्कृत तथा कारवाही गर्नुपर्ने सचिवदेखि तल्लो तहसम्मका कर्मचारीलाई मन्त्रीले चिलले कुखुराको चल्लो टिपेझैँ टिप्न थालेपछि प्रशासनको मूल्य मान्यता स्खलित भएको बताइन्छ ।

Advertisement 1

बेमौसममा हालै एकाध सचिवको सरुवा भएको छ । श्रम,रोजगार तथा सामाजिक सुरक्षा मन्त्रालयका सचिव एकनारायण अर्याललाई एकाएक हटाइएको छ । सचिव हटाइएकोबारे कसैले प्रष्ट भनेका छैनन् । सरकारले औपचारिक जानकारी पनि दिएको छैन ।

अर्यालले सामाजिक सुरक्षा कोषको स्थापनादेखि धेरै वटा काम गरेका थिए । अन्य धेरै वटा काम पाइपलाइनमा राखेका सचिवलाई फुत्त टिपेर फालिएपछि अनेक आशंका उत्पन्न भएको छ । प्रधानमन्त्री र मुख्यमन्त्रीको कान फुकेपछि फुत्त सचिव फाल्ने प्रवृत्तिले प्रशासन संयन्त्र ध्वस्त भएको छ भने सचिवहरु हल्लुँडोमा परिणत हुँदै गएको प्रशासनविद्हरुको विश्लेषण छ ।

Advertisement 2

सचिव हटाएर श्रम, रोजगार तथा सामाजिक सुरक्षामन्त्री शरतसिंह भण्डारी गएराति स्वीट्जरल्याण्ड गएका छन् । उनी जेनेभामा हुने अन्तर्राष्ट्रिय श्रम संगठनको सम्मेलनमा भाग लिन गए राति सवा २ बजे कतार एअरवेजको उडान नम्बर क्युआर ६४५ बाट दोहातर्फ प्रस्थान गरेका थिए ।

त्यसैगरी खानेपानी मन्त्रालयमा सचिव मणिराम गेलाललाई हटाएर रामआधार साहलाई लगिएको छ । प्रधानमन्त्री कार्यालयमा जगेडामा राखिएका साह इञ्जिनियरिङ समूहका सचिव हुन् ।

यता गृह मन्त्रालयमा वरिष्ठहरु हुँदाहुँदै दिनेश भट्टराईलाई सचिव बनाइएको छ । ‘कमजोरलाई लैजाँदा प्रयोग गर्न सजिलो हुने भएकाले त्यसो गरिएको हुनसक्छ,’ प्रधानमन्त्री कार्यालयमा थन्काइएकामध्ये एक जना सचिवले भने ।
छापामार शैलीमा सचिव हटाउने प्रवृत्तिले निजामती प्रशासन कमजोर बन्दै गएको छ । अनावश्यक काम मन्त्री र राजनीतिज्ञले गर्न उक्साउने र पछि सचिवलाई दोष लगाउने चलनको नेपाली समाजमा नजीर नै बनेको छ । ‘नेताहरुलाई पैसा चाहिएको छ, चाकडी चाहिएको छ, दलाल चाहिएको छ । पैसा, चाकडी र दलाली नगर्नेलाई छानेर फाल्ने गरिन्छ,’ केही समयअघि अवकाशप्राप्त एक जना सचिवले बताए ।