‘मिलाएर खाउ,ज्यान बनाउ’यस्तै धन्दामा लिप्त छन् अहिले गृह मातहतका कर्मचारीहरु । अहिले सबैभन्दा बढी विकृती कतै छ भने त्यो हो गृहको कर्मचारी परिचालनमा । खाँण मन्त्री बने यताका सात महिनामा २१ पटक सीडीओहरूको हेरफेर गर्न भ्याएका छन् तर कर्मचारी अर्थात सिडिओ परिचालन गर्दा न कानूनमा स्नातक हेरिएको छ त न तालिम नै लिएकालाई पठाइएको छ । भद्रगोल कतिसम्म भने जिल्लामा खटिएका सिडिओ उपसचिव तहका अन्य निकायका हाकिम सहसचिव तहका । यसरी आफूभन्दा कनिष्ठ कर्मचारीले माथिल्ला तहका कर्मचारीलाई निर्देशन कसरी दिनसक्छ ? अनि उस्ले दिएकै निर्देशन माथिको कर्मचारीले किन टेर्छ ?
अहिले गृहका कप्रमा बस्ने,गृहमन्त्रीका सल्लाहकारहरुले सिडिओ बनाएर खटाउँदा जागिर खाऊ, पैसा कमाऊ, हामीलाई पनि बुझाऊ भन्नेबाहेक अरु केही नियत नराखेको गृहकै कर्मचारीहरु आरोप लगाउँछन् ।
त्यसमाथि कप्रका हाकिम हुँदा पत्नीलाई सहायक सिडिओ बनाउन भ्याएका सुनिल खनालले रातारात भाइलाई पनि सिडिओ बनाएर पठाइदिएका छन् । दशैंको मुखमा गुपचुप उनले पत्नीलाई काठमाडौंको सहायक सिडिओ बनाएर पठाएका थिए । काँग्रेसी पृष्टभूमिको सुप्रभा खनाललाई रातारात उर्जाबाट गृहमा तानेर काठमाडांैंको सहायक सिडिओ बनाए । पत्नीलाई सहायक सिडिओ बनाएर पठाएको अर्काे हप्ता ५८ बर्षे उमेर हद लागेर घर गए । तिनै खनाल गृहमन्त्री खाँणको अहिले सुरक्षा सल्लाहकार छन् । मुलुकमा एमसीसीको बहसले तिव्र रुप लिइरहेको समयमा सबैको ध्यान उतैतिर भएको मौका पारेर भाइ अस्ति शुक्रवार अनिललाई सोलुखुम्बुको प्रमुख जिल्ला अधिकारी बनाएर पठाउन भ्याएका छन् । त्यहाँका प्रमुख जिल्ला अधिकारी रहेका गणेश विक्रम शाहीलाई १३ महिना पछि गृहमा तानेर त्यहाँ आफ्नो भाइलाई पठाइएको हो । उता ताप्लेजुङका प्रमुख जिल्ला अधिकारीमा महेश पोखरेल पठाइएको छ । पोखरेल नाताले गृहका सहसचिव तथा प्रवक्ता फणिन्द्रमणि पोखरेलका नातेदार हुन । उनी यस अघि सुनसरीका सहायक सीडिओ चलाइसकेका व्यक्ति हुन । अहिले सबैभन्दा बढी व्यथिती र भद्रगोल नै गृहका कर्मचारी सरुवामा देखिन थालेका त्यहाँका कर्मचारीहरु सुनाउँछन् ।