संघीय मामिला तथा सामान्य प्रशासन मन्त्रालयले एकै पटक ठूलो संख्यामा कर्मचारीहरुको सरुवा गर्ने तयारी गर्दैछ । मन्त्रालयले १६ सय भन्दा बढी संख्यामा स्थानीय तहमा कार्यरत कर्मचारीहरुको सरुवा गर्न लागेको हो । कर्मचारी समायोजन पछि स्थानीय तहमा पुगेका कर्मचारीहरुको सरुवाको सूची बनिरहेको मन्त्रालयल स्रोतले जनाएको छ ।
मन्त्रालयका अनुसार, गत वैशाखमै एक स्थानीय तहबाट अर्काे स्थानीय तहमा सरुवा हुनका लागि अनलाइनबाट आवेदन दिएका कर्मचारीहरुको सरुवा गरिन लागेको हो ।

Advertisement 1

मन्त्रालयले गत वैशाखमै एक स्थानीय तहबाट अर्काे स्थानीय तहमा सरुवा हुन चाहने कर्मचारीहरुबाट आवेदन माग गरेको थियो । गत ०७८ वैशाख २० गतेसम्म एक स्थानीय तहबाट अर्काे स्थानीय तहमा सरुवा भइ काम काज गर्न चाहने कर्मचारीहरुसँग आवेदन माग गरेको थियो ।
लोकसेवा आयोगबाट स्थायी नियुक्त भएका कर्मचारी व्यवस्थपनसम्बन्धी व्यवस्था ०७७ बमोजिम दुबै स्थानीय तर्फका दोहोरो सहमति सहित कर्मचारीहरुबाट आवेदन माग गरिएकोमा झण्डै २५ सय कर्मचारीले आवेदन दिएको मन्त्रालयले जनाएको छ ।

संघीय मामिला तथा सामान्य प्रशासन मन्त्रालयका अनुसार त्यसमध्ये एकै व्यक्तिले ५ पटकसम्म निवेदन दिएको भेटिएको छ ।  जसमध्येबाट स्थानीय तहमा कार्यरत रहेका र एक  तहबाट अर्काे स्थानीय तहमा काम गर्नका लागि दोहोरो सहमति समेत जुटाई मन्त्रालयमा निवेदन दिएका १६०० कर्मचारीको एकै लटमा सरुवा गर्न लागेको मन्त्रालयले जनाएको छ ।

Advertisement 2

दोहोरो सहमति जुटाएर अनलाइनबाट निवेदन दिएको लामो समय व्यतित हुँदासम्म आफूहरुको माग सुनुवाई नभएपछि स्थानीय तहमा कार्यरत कर्मचारीहरु आन्दोलित भएका थिए । उनीहरुले गत कार्तिक १० मै सचिव एकनारायण अर्याललाई ध्यानाकर्षण गराएका थिए । यस्तै गत १२ मंसिरमा मात्र मन्त्री राजेन्द्र श्रेष्ठलाई यस बिषयमा ध्यानाकर्षण गराएका थिए ।मन्त्री श्रेष्ठले स्थानीय तहमा कार्यरत ती कर्मचारीहरुको माग सम्बोधन गर्दै सरुवाको सूची निकाल्न निर्देशन दिनुभएको हो । उनीहरुको आज वा भोलीमै सरुवा गर्ने सामान्य प्रशासनको तयारी छ ।

मन्त्री श्रेष्ठकै अग्रसरतामा दोहोरो सहमति जुटाएका कर्मचारीहरुको एक स्थानीय तहबाट अर्काे स्थानीय तहमा आज वा भोलीमै सरुवाको सूची निकाल्न लागिएको हो । यस बिषयमा अहिले केही बेरपछि मन्त्री श्रेष्ठले पत्रकार सम्मेलन गर्दै हुनुहुन्छ ।