बर्षाैदेखि हराएका कर्मचारी खोज्दै कृषि मन्त्रालय
कृषि तथा पशुपक्षी मन्त्रालयले लामो समयदेखि सम्पर्क विहिन रहेका कर्मचारीको खोजी शुरु गर्न थालेको छ । विदा स्वीकृत नगराई आफू कार्यरत संस्थालाई समेत जानकारी नदिई लामो समयदेखि सम्पर्कमा नरहेका कर्मचारीहरुको खोजी प्रारम्भ गरेको हो । मन्त्रालयले आज दुई वटा भिन्ना भिन्नै सूचना प्रकाशन गरी ९० दिनभन्दा बढी समयदेखि गायब रहेका कर्मचारीहरुलाई मन्त्रालयमा हाजिर हुन भनेको छ ।
सूचना अनुसार बाली विकास अधिकृत निधि श्रीवास्तव ०७५ साल फागुन १९ गतेदेखि गयल रहेको हुँदा उनलाई निजामती सेवा ऐनको दफा ६१ (१) छ को कसुरमा सोही ऐनको दफा ५९ को खण्ड (ख)को देहाय (१) बमोजिम भविष्यमा सरकारी सेवामा अयोग्य नहुने गरी सेवाबाट हटाउनु पर्ने सजाय गर्नु नपर्ने उचित कारण १५ दिनभित्र पेश गर्न भनिएको छ ।
Advertisement 1
यस्तै बरिष्ठ कृषि अधिकृत जयन्ती कुमारी भुषाललाई लामो समयदेखि विदा स्वीकृत नगराई मन्त्रालयको सम्पर्कभन्दा बाहिर रहेका कारण यस अगावै सार्वजनिक सूचना प्रकाशन गर्दा समेत कुनै चित्त बुझ्दो जबाफ नदिएका कारण ३० दिनभित्र मन्त्रालयमा स्पष्टीकरण दिन भनिएको छ ।
मन्त्रालयको प्रशासन महाशाखाका अनुसार यसरी सम्पर्क विहिन हुने कर्मचारीको संख्या ३० जना भन्दा बढी छ ।
Advertisement 2
आफ्नै मातहतका कर्मचारी बिना सुचना हराउने क्रम बढ्न थालेपछि मन्त्रालयले खोज्न शुरु गरेको हो । सरकारको कृषि तथा पशुपक्षी विकास मन्त्रालय अन्तर्गत रहेका दुई उपसचिवसहित १३ जना अधिकृत तहका कर्मचारी वर्षौंदेखि बेपत्ता छन् ।
कृषि तथ पशुपक्षी मन्त्रालय श्रोतले बताए अनुसार, बेपत्ता भएका ति अधिकारीहरु यतिबेला अमेरिका, बेलायत, अस्ट्रेलियालगायत देशमा सुखसयलका साथ रहेकाछन् । सरकारी रकम खर्च गरेर अध्ययन र तालिमका लागि भन्दै विदेशीएकाहरु अध्ययन र तालिम सकिएपछि पनि स्वदेश नफर्कीकन उतै जागिर खाएर बसेको मन्त्रालय श्रोतले बताएको छ । मन्त्रालयका यस्ता बेपत्ते केही अधिकारीहरु सेवा निवृत्त समेत भईसकेकाछन् । तर यस सम्बन्धि कुनै अभिलेख मन्त्रालयसँग छैन् । मन्त्रालयका अनुसार यसरी बेपत्ता हुनेमा उपसचिवस्तरका कर्मचारीहरु समेत छन् ।
Advertisement 3
निजामती सेवा ऐनअनुसार बिनासूचना लगातार ९० दिनसम्म कार्यालयमा अनुपस्थित हुने कर्मचारीलाई सेवाबाट हटाउने प्रक्रिया थाल्नुपर्छ । तर, कृषि मन्त्रालयको प्रशासनिक नेतृत्वले त्यस सम्बन्धमा कुनै पहल नै नगर्दा ती कर्मचारीमाथि कारबाही हुन नसकेकोमा अब खोजतलास गरी कारबाही प्रक्रिया अघि बढाएको छ ।
