आजबाट बालिग भयौ तिमी, बयस्कहरुको संसारमा स्वागत छ । अब म अभिवावकको जिम्मेबारीबाट अवकास पाएर परामर्शदाताको जिम्मेबारीमा रहने छु । आजबाट चाहना अनुकुल काम गर्न स्वतन्त्र छौ तिमी तर संगसंगै गरेका हरेक कामको जिम्मेवारी पनि तिमीमै आउछ । बाच्नका लागि अत्यावश्यक कला सिक्यौ । अब उपरान्त अनन्त सम्भावना बोकेको मानव जीवन यात्रामा प्रारम्भ गर्नु पर्नेछ तिमीले । मेरा केही अनुभवहरु यस यात्रामा सामलको रुपमा तिमीलाई दिन चाहन्छु । आवश्यकता महसुस हुदा प्रयोग गर्नु । साथै तिम्रो लागि निम्ति जागृत जीवनको कामना गर्दछु ।

Advertisement 1

मानव शरिर लिएर जन्मे पछि कर्म गर्नै पर्दछ । कस्तो कर्म गर्ने भन्ने कुरा तिम्रो छनोटको कुरा हो । सबैले सबै कर्म यानी काम गर्न सक्दैनन् । मान्छेले कुन काम प्रभावकारी रुपमा गर्न सक्छ भन्ने कुरा उसले जन्मदै ल्याएको प्रकृतीले निर्धारण गर्ने कुरा हो । आफ्नो प्रकृती कस्तो हो रु कस्तो काम गर्ने रु भनेर थाहा पाउन समय लाग्दछ । जुन काम गरिरहदा तिमीलाई मजा आउछ, थकाई र झर्को लाग्दैन । काम सम्पन्न गरिसके पछि एक प्रकारको पुर्णताको सन्तुष्टी मिल्दछ भने त्यो तिम्रो प्रकृती अनुकुलको काम हो । जुन काम गर्दा थकान महसुस हुन्छ, झर्को लाग्छ र काम सम्पन्न गरी सक्दा पनि पुर्णताको सन्तुष्टीको साटो ग्लानीको महसुस हुन्छ भने त्यो काम गर्न तिमी जन्मेको होईनौ बुझ्नु तिमीले । कुनै पनि शर्तमा ग्यानी हुने कामलाई तिमीले निरन्तरता नदिनु । मानव जिवन सुनौलो अवसर हो । यसमा आफैलाई मिचेर बाच्नु आवश्यक छैन ।

छोरा ! मोटरको शक्ति ईन्जिनमा भए जस्तै मान्छेको शक्ति नैतिकता र मर्यादामा हुन्छ । मानव जीवनमा नैतिकता र मार्यादा रोग प्रतिरोधात्मक शक्ति जस्तै हुन् यदि नैतिकता र मार्यादा दैनिकीमा छन् भने वातावरणमा भएको कुनै पनि महामारीले व्यक्तिको केही बिगार गर्न सक्दैन । तर जीवनशैलीमा नैतिकता र मार्यादा छैन भने मान्छेलाई जुनसुकै बेला कुनै पनि प्रकारको मनको रोग लाग्न सक्दछ । त्यसैले आफ्नो जीवनशैलीलाई नैतिकता र मर्यादाले शक्तिशाली बनाएर राख्नु ।

Advertisement 2

कर्म गरिरहदा तिमीले जान्नु, मानव जीवनमा सानातिना गल्ती भैरहन्छन् यो स्वभाविक पनि हो किनकी मान्छेले सिक्ने भनेकै गल्तीबाट हो । गल्ती गर्नु गल्ती होईन तर एउटै गल्ती पटक पटक दोहराउनु चाही हुदैन । एउटै गल्ती दोहरीरहनु भनेको मान्छे चेतनशिल भएर बाचेको छैन भन्ने हो । गल्ती गर्नु र गल्तिबाट सिक्नु र अगाडी बढ्नु । गल्तीमा अल्झेर बस्नु पनि हुदैन ।

बास गरेको कोखको नाताले होईन कि जन्मदै ल्याएको प्रकृतीको नाताले तिमीले क्षत्रिय धर्मको पालना गर्नु । क्षत्रियले पहिले आफ्नो पौरखले राज्य खडा गर्छ अनि राज गर्दछ । क्षत्रिय राज्यमा कमजोरको रक्षा हुन्छ भने क्षामतावान् को मान हुन्छ । क्षत्रियहरु संसारिक सुखबाट भागेर होइन भोगेर, जानेर अनि जागेर जीवनबाट पार हुन्छन् । तिमीले सकेसम्म यही बाटो अबलम्बन गर्नु ।

छोरा ! जीवनका दुई पक्षहरु हुन्छन्, एक तथ्य अर्को सत्य । तथ्य त्यो हो जो समयकाल अनुसार परिबर्तन हुन्छ । तथ्य कहिले हाम्रो अनुकुल हुन्छ भने कहिले प्रतिकुल हुन्छ । तथ्य प्रतिकुल हुदा नआतिनु । तथ्य अनुकुल हुदा नमातिनु । बुझ्नु, तथ्यको अनुकुलता र प्रतिकुलताको चक्र रात र दिनको जस्तो हुन्छ । एक पछि अर्को घुमिरहन्छ । त्यसैले तथ्यका सम्बन्धमा त्यति धेरै चिन्ता नलिनु तिमीले । जीवनको अर्को पक्ष हो सत्य । सत्य जहिले पनि एउटै हुन्छ । सत्यको विपरित भएर बाच्यो भने जीवन असहज हुन्छ भने सत्यको अनुरुप भएर बाच्यो भने जीवन सहज हुन्छ ।

मैले अनुभव गरेका केही सत्यहरुः
 प्रेम बिना जीवन बिरसिलो हुन्छ सधै प्रेमिल भएर जीउनु । मैले भन्न खोजेको प्रेम सम्बन्ध नभएर भावनात्मक अवस्था हो ।
 परिस्थति भन्दा पनि मनस्थितिले हामीले बाच्ने जीवनको स्तर निर्धारण गर्दछ ।
 यस जीवनमा कुनैपनि प्रतिस्पर्धा जित्नु महत्वपुर्ण होईन तर निष्ठा पुर्वक खेल्नु चाही महत्वपुर्ण हो ।
 सुख र शान्ति सन्तुलित जीवनमा हुन्छ र सन्तुलित जीवन मध्य मार्गमा हुन्छ ।
 जीवनमा कुनै पनि घटना नकारात्मक हुदैनन् मात्र हाम्रो अपेक्षाको अनुकुल या प्रतिकुल हुन्छन् ।
 मान्छे जे जस्तो हुन्छ उसको लामो कर्मको श्रृङ्खलाका कारणले हुन्छ । त्यसैले कसैलाई पनि हामी परिवर्तन गर्न सक्दैनौ । व्यक्ति स्वयम् मात्र परिवर्तन हुन सक्छ त्यो पनि पुरानो कर्मको श्रृङ्खलाका तोडेर मात्र ।
परमात्मा र आमाको काख हरेक व्यक्तिको नैसर्गिक अधिकार हो र तिम्रो पनि । तिमी संसारले भन्ने गरेको सफल व्यक्ति हुदा या नहुदा, तिम्रो मन भ्रममा परेर तिमीले गल्ती गर्दा या मन सशक्त सत्यको बाटो हिडिरहदा, संसारले तिमीलाई प्रसंसाको माला लगाउदा या आलोचनाको झापड लगाउदा याद गर्नु तिमीले । यस संसारमा दुई ढोका तिम्रा निम्ति कहिलै बन्द हुने छैनन् । पहिलो परमात्माको ढोका अनि दोश्रो आमाको । यी ढोकामा तिमी जहिले आए पनि प्रेममय प्रतिक्षा पाउने छौ । जीवनले तिमीलाई थकाउला, हैरान गराउला । मनले निरास बनाउला । प्रेम, उल्लास र उत्प्रेरणा लिन तिमी यी ढोकामा आईरहनु, धाईरहनु ।
                                                           प्रेममय जीवनको कामना सहित, आमा