सहायकस्तरका कर्मचारीलाई आएको वैदेशिक तालिम अध्ययनको भाग समेत खोसेर हाकिमहरु विदेशतिर उडेका उड्यै छन् ।

Advertisement 1

यस्तो लाजलाग्दो हर्कत गर्नमा गृहका हाकिमहरु अग्रपक्तिमा देखिए । विपद्मा सबैभन्दा धेरै सक्रिय हुनुपर्ने निकायमा पर्छन्, राष्ट्रिय विपद् जोखिम न्यूनीकरण तथा व्यवस्थापन प्राधिकरण । त्यहीका हाकिमहरु कहिले चीन,बेलायत,जापान उडेका उड्यै छन् । त्यो पनि सहायक कर्मचारीहरुको भाग खोसेर ।

त्यही भीडमा थपिने भएका छन्,सदाबहार प्रमुख जिल्ला अधिकारी जयनारायण आचार्य । सुरक्षा निकायका सहायक एवम् जुनियर अधिकृत, विश्वविद्यालयमा अध्ययनरत शोधकर्ता, रेडक्रस लगायत निजी क्षेत्रका कर्मचारी एवम् इन्टर्न्सिप गरिरहेका विद्यार्थीको सहभागिता रहने एउटा वैदेशिक कार्यक्रममा सहभागिता जनाउन प्राधिकरणको नीति योजना तथा अनुगमन महाशाखाको हाकिम (सहसचिव) आचार्य विदेशतिर उड्ने सुरसार गर्दैछन् ।

Advertisement 2

जिम्मेवार पदमा बसेकाहरुमा देशको अवस्थाप्रति अलिकति पनि चिन्ता नगर्ने परिपाटीले सरकारीस्तरका वैदेशिक भ्रमण बढेको टिप्पणी भइरहेको बेला गृहकै  उच्च अधिकारी अरुको भाग खोसेर वैदेशिक भ्रमणमा निस्किन लागेका हुन ।

गृह स्रोतका अनुसार स्वीडिस ईन्टरनेशनल डेभलपमेन्ट कोअपरेशन एजेन्सीले आयोजना गर्ने एउटा कार्यक्रममा भाग लिन आचार्यले सहमति लिइसकेका छन् ।

स्वीडिस ईन्टरनेशनल डेभलपमेन्ट कोअपरेशन एजेन्सीले (सिडा)ले सञ्चालन गर्ने एक वर्ष लामो विपद व्यवस्थापन सम्बन्धी कार्यक्रम सन २ ०२३ को डिसेम्बर बाट प्रारम्भ भइ २ ०२४ को डिसम्बर सम्म सञ्चालन हुने जनाइएको छ । ९५ प्रतिशत अनलाईन माध्यमबाट ५ प्रतिशत मात्र भौतिक रुपमा सञ्चालन हुने मोडालिटी रहेको उक्त कार्यक्रममा सहभागीता जनाउने गरी आचार्यले सहमति लिइसकेको गृहको उक्त स्रोतले जनाएको छ ।

अनलाईन शत्रहरु सहभागीको राष्ट्रमै बसेर तथा भौतिक कक्षाका लागि मात्र स्वीडेनमा लाने हुँदा १० दिन स्वीडेन भ्रमणको अवसर प्राप्त हुन्छ । नेपाल बंगलादेश र फिलिपिन्सका विपद व्यवस्थापनमा प्रत्यक्ष सहभागिता जनाउनुपर्ने जुनियर तहका कर्मचारी सहभागिता रहने उक्त कार्यक्रममा भाग लिनका लागि सहसचिव तहको कर्मचारी समेत लालायित हुनुले नेपाल सरकारका उच्च तहका कर्मचारीहरु विदेश जाने नाममा कतिसम्म गिर्न सक्छन् भन्ने अर्को एउटा उदाहरण सामुन्नेमा आएको छ ।

कार्यक्रमका विषयमा थप स्पष्ट हुन हाम्रा प्रतिनिधिले स्विडिस सिविल एजेन्सीलाई सहयोग गर्ने नेपाल प्रतिनिधिलाई सम्पर्क गर्दा यस प्रकारको तालिम ५ वटा सम्पन्न भैसकेको, एउटा चलिरहेको र आगामी कार्यक्रमको लागि सहभागी छनौट भैसकेको तथा आगामी वर्षको तालिम कार्यक्रम डिसेम्बर २०२३ बाट शुरु हुने जानकारी दिए ।

तालिममा एकवर्ष भरी अनलाईन कक्षाहरु लिनुपर्ने र हरेक दिन कार्यालय समयको न्यूनतम ४० प्रतिशत समय अनलाईन कक्षालाई दिनुपर्ने हुँदा सहभागीहरुले कार्यालयको काम छोडेर त्यस्ता कक्षामा सहभागी हुन सक्छु भनि पूर्व घोषणा फारम भरेका हुनुपर्ने पनि उनले जनाए । कार्यालयको दैनिन्दनका काम प्रभावित हुने, सहभागी अन्य राष्ट्रहरुबाट पनि उच्च तहका कर्मचारीहरु मात्र सहभागी हुने भएकोले हालसम्म नेपालबाट पनि उच्च तहको सरकारी अधिकारीको सहभागिता नरहेको पनि जानकारी प्राप्त भएको छ । तथापी राष्ट्रिय विपद् जोखिम न्युनीकरण तथा व्यवस्थापन प्राधिकरण जस्तो संवेदनशील निकायको महत्वपूर्ण जिम्मेवारीमा रहेका व्यक्ति कार्यालयको कामै छोडेर सहभागी हुनुपर्ने यस्ता तालिममा पठाउनु गैर जिम्मेवारीको पराकाष्ठा भएको गृहकै एक अफिसरले टिप्पणी गरे ।

त्यसमा पनि मुलुकमा शान्ति सुरक्षा र अमन चयन तथा सुशासनको मसिहाको रुपमा काम गरिरहेको बताउने गृहमन्त्री नारायणकाजी श्रेष्ठकै मन्त्रालयका सहसचिवले सहायक तहका कर्मचारीको भाग खोसेर विदेश घुम्ने मोहमा आफ्नो पदको गरिमा र अन्तर्राष्ट्रिय स्तरमा मुलुकको छवि दाउमा लगाउन उद्दत देखिनु विडम्बना भएको गृहबाटै रिटायर्ड भएका एक सचिवको टिप्पणी छ ।

जयनारायण तिनै सहसचिव हुन,यस अघि जाजरकोटमा भूकम्प गएर सयौं मानिसको ज्यान गए,हजारौं घरबार बिहिन हुँदा प्राधिकरणका कार्यकारी प्रमुख अनिल पोखरेलसहित सहसचिव रामेश्वर मरहठ्ठा, गृह सचिव दिनेश भट्टराईको सरकारी टोली विनाशकारी भूकम्पमा आफूले निर्वाह गर्नुपर्ने भूमिका पन्छाएर जापान भ्रमणमा थिए । त्यहाँका सहसचिवको भूमिकामा रहेका आचार्य लामो समयदेखि स्वीकृत बिदामा बसेका थिए ।

अधिकांश हाकिमहरुले वैदेशिक अध्ययन तथा तालिम भ्रमणका लागि प्राप्त भएका पत्रहरु लुकाउने र खरिदार,सुब्बा तहका लागि आएको निमन्त्रणामा समेत आफैं विदेशतिर दौड्ने रोग अहिले सरकारी कार्यालयमा बढ्दै गएको छ । यस्तोमा दौड्न खोज्ने हाकिममात्र होइन स्वीकृति( सहमती) दिनेको पनि खोट देखिन्छ । छाडातन्त्रमा रुपान्तरण हुँदै गएको यी विकृतीमा लगाम लगाउने कस्ले ?