संघीय मामिला तथा सामान्य प्रशासन मन्त्रालयले निजामती किताबखानाको महानिर्देशकमा कमल भट्टराईलाई पठाउने तयारी गरिरहेको छ ।
संघीय मामिला तथा सामान्य प्रशासनबाट सरुवा हुँदा यस अघि पर्यटन विभाग ताकेका भट्टराईलाई पुल्चोकस्थित निजामती किताबखानाको महानिर्देशकको जिम्मेवारी दिएर पठाउने तयारी भइरहेको सामान्य प्रशासन स्रोतले जनाएको छ ।

Advertisement 1

अहिले संघीय मामिला तथा सामान्य प्रशासन मन्त्रालयको प्रवक्ताको जिम्मेवारी समेत सम्हालिरहेका भट्टराईलाई रिक्त रहेको निजामती किताबखानाको महानिर्देशकको जिम्मेवारीमा पठाउने तयारी भइरहेको हो ।

तत्कालीन सचिव कृष्णहरि पुष्करले सहसचिव कमल भट्टराईलाई अर्थबाट सामान्य प्रशासनमा लगेर त्यहाँको कर्मचारी प्रशासनको हर्ताकर्ता र प्रवक्तासमेतको जिम्मेवारी दिएका थिए । तर केही सरुवामा गडबडी भएको गुनासो छरपष्ट भएसँगै तत्कालीन मन्त्री मोदीले कर्मचारी महाशाखाको प्रमुखको जिम्मेवारीबाट हटाएका थिए ।

Advertisement 2

मन्त्रालयले ४४ जना सहसचिवहरुको सरुवा गर्दा सहसचिव भट्टराईलाई पर्यटन मन्त्रालयमा खटायो तर उनलाई पर्यटन मन्त्रालयमा दरबन्दी रिक्त नभएको भन्दै हाजिर गराइएको थिएन । पर्यटनमा हाजिर नभएका भट्टराईलाई मन्त्रालयकै नीति योजना तथा विकास समन्वय महाशाखामा पठाइएको थियो ।

उनी जान खोजेको पर्यटन विभागको जिम्मेवारी हालैमात्र चक्र बहादुर बूढाले पाएका छन् । पर्यटनमा इन्ट्री नपाएका भट्टराई निजामती किताबखानामा महानिर्देशकको जिम्मेवारी दिएर सरुवा गरिन लागेको हो, सामान्य प्रशासन मन्त्रालय स्रोतले भन्यो ।

निजामती किताबखानाको जिम्मेवारी सम्हालिरहेका हाकिम टोकराज पाण्डेलाई अहिले एयरपोर्टमा लगिएसँगै त्यहाँको महानिर्देशक पद रिक्त छ । अहिले उपमहानिर्देशकको भूमिकामा छिन्,सुशीला अर्याल । सोही निकायको महानिर्देशको जिम्मेवारी दिएर उनलाई किताबखनामा पठाउन लागिएको हो ।