विज्ञहरुले एकाथरी सल्लाह दिए तर प्रधानमन्त्री प्रचण्डले दिल्ली भ्रमणको क्रममा सल्लाहभन्दा फरक बिषय उठान गरेर फर्कनुभयो ।प्रधानमन्त्री पुष्पकमल दाहाल प्रचण्डले भारतसँगको सीमा समस्या दीर्घकालीन समाधानका लागि ‘बंगलादेश मोडल’ को नयाँ विकल्प बाहिर ल्याएपछि तरंग पैदा भएको हो ।

Advertisement 1

दिल्ली भ्रमणमा जानु अघि प्रधानमन्त्री पुष्पकमल दाहाललाई नापी विभागका पूर्व महानिर्देशक,वर्तमान निर्देशकदेखि सीमाविद्हरुसँग सल्लाह मागेका थिए । सोही बमोजिम प्रधानमन्त्री प्रचण्डलाई भेट्नका लागि बहालवाला र पूर्व गरी ९ जना कर्मचारीहरु पुगेका थिए ।
विभागका पूर्वमहानिर्देशक बुद्धिनारायण प्रधान, पुण्य ओली, राजाराम छत्कुली, गणेश भट्ट,कृष्णराज बिसी,प्रकाश जोशी,मधुसुदन अधिकारी,जनकराज जोशीसहित सीमा सम्बन्धका जानकारहरू पुगेका थिए । सहभागीहरु सो छलफलमा सीमा सम्बन्धका विज्ञहरूले एकाथरी सुझाव दिएका थिए तर प्रचण्डले तर दिल्ली पुगेपछि बेग्लै धारणा सार्वजनिक भएपछि सल्लाह दिन पुगेकाहरु नै चकित परेका छन् ।
गत वैशाख ९ गते बेलुकी बालुवाटार पुगेको नापी विभागसम्बद्ध एउटा टोलीले प्रधानमन्त्रीलाई नेपाल–भारत सीमा समस्या ऐतिहासिक तथ्य र प्रमाणका आधारमा समाधान गर्नुपर्ने र त्यसको लागि प्रधानमन्त्री तहमा समझदारी जुट्नुपर्ने सल्लाह दिएको थियो । सीमा समस्याबारे नेपालले भारतीय पक्षसँग उठाउनुपर्ने विषयका सम्बन्धमा विज्ञहरूले सुझाव दिँदा सचिवस्तरीय संयन्त्रलाई कामकाजी बनाउनुपर्नेमा पनि जोड दिइएको थियो ।

चर्चा नै नगरिएको ‘बंगलादेश मोडल’ एकाएक कहाँबाट चुहियो ? आशंका गर्नेहरू भन्छन्– भारतनिकट भनिने केही कर्मचारीले आफ्नो स्वार्थअनुसार प्रधानमन्त्रीको मुखबाट यो कुरा बकाएका हुन् । बंगलादेश मोडल भनिएको जमिन साँटफेरको यो विकल्प प्रधानमन्त्रीको मुखबाट फुत्कियो कि अरुबाट फुत्काइयो ! प्रधानमन्त्री प्रचण्डलाई भेटेर फर्किएका एक जना पूर्व महानिर्देशकले भनेका छन् ।