एक जना सामान्य कर्मचारी (कार्यालय सहयोगी)ले ट्रेड युनियनको आडमा कतिसम्म खेलो फड्को गर्न सक्दछ भन्ने उदाहरण छ । दशैंको मुखमा बुद्धनगरस्थित बैरो कार्यालयका हाकिमलाई फकाएर- तर्साएर सत्तासीन कांग्रेसनिकट नेपाल निजामती कर्मचारी युनियनका एक पदाधिकारीले आफूसहित सात जना कर्मचारीको रोजे(खोजेकै अड्डामा सरुवा मिलाएका छन् ।

Advertisement 1

सातै जना कर्मचारीलाई वैदेशिक रोजगार विभाग मन्त्रालयबाट ताहाचलस्थित वैदेशिक रोजगार कार्यालयमा पुर्याउन सफल खेलाडी नासु हुन् भूपेन्द्र अधिकारी । स्थायी ठेगाना रुकुम भएका उनी केही महिनाअघि युवा सचिव चुनिएका थिए । कर्मचारी युनियनमा ७ जना त सचिव नै हुने व्यवस्था छ । ४ खुला र ३ समावेशीबाट छानिँदा भूपेन्द्र समावेशी कोटाबाट परेका हुन् । उनी यसअघि एयरपोर्टको श्रम डेस्कमा थिए । त्यहाँ पनि खेतीपाती धन्दा बढ्न थालेपछि सो डेस्क नै खारेजीमा पर्यो ।

अहिले त्यहाँ डिजी छन्, उमाकान्त आचार्य । यसअघिका हाकिम शेषकान्त पौडेल पीचएडी गर्न जापान गएसँगै सो ठाउँमा श्रम तथा व्यवसायजन्य विभाग, मीनभवनबाट आचार्यलाई लगिएको हो । उनै आचार्यलाई फस्ल्याङ फुस्लुङ पारेर अधिकृत डिल्ली अधिकारी, कम्प्युटर अधिकृत प्रकाशचन्द्र अधिकारी, कम्प्युटर अधिकृत उन्नती अधिकारी, मनिष शर्मा, सुमन शर्मा, सूर्य रेग्मीसहित भूपेन्द्र ताहाचल पुगेका हुन् । त्यहीं बसिसकेका कर्मचारी घुमिफुरी श्रम कार्यालयमा पुगेसँगै विभिन्न मन्त्रालय तथा निकायबाट गएका झण्डै दर्जन कर्मचारी चिल्लै भएका छन् । गत असोज पहिलो साता सरुवा भएकामध्ये प्रकाशचन्द्र अधिकारी, उन्नति अधिकारी, र मनिष शर्मालाई रिइन्ट्री शाखाको जिम्मेवारी दिइएको छ भने सुमन शर्माले साउदी अन्तिम स्वीकृतिको जिम्मेवारी पाएका छन् । सूर्य रेग्मी र भूपेन्द्रलाई नयाँ व्यक्तिगत स्वीकृति शाखाको जिम्मेवारी दिइएको छ ।

Advertisement 2

केही महिनाअघि उसैगरी कांग्रेसनिकट नेपाल निजामती कर्मचारी युनियनका पूर्वउपाध्यक्ष शंकर गिरीले यसैगरी सरुवाको धन्दा चलाएको खुलेपछि त्रिपुरेश्वरमा बबाल मच्चिएको थियो । गिरीले आफू कार्यरत भैरहवा भन्सार कार्यालयमा लैजानका लागि तीन जना कर्मचारीको नाम तत्कालीन हाकिम नारायण सापकोटालाई टिपाएकोमा ती कर्मचारीसँग जनही पाँच(पाँच लाख कबोल गरेको रहस्य खुलेपछि सापकोटाले हकार्दै कार्यालयबाट लखेटेका थिए ।