‘रक्षक नै भक्षक’ भएपछि कसको के लाग्छ ? नागरिकको ज्युधनको सुरक्षा गर्ने जिम्मेवारीमा रहेका प्रमुख जिल्ला अधिकारी (सिडिओ) नै कानुन हातमा लिएर सोझासिधा जनतामाथि अचाक्ली गर्न थालेपछि कपिलवस्तुवासीले यस्तो प्रश्न गर्न थालेका हुन् । नवलपरासीबाट सरुवा भई कपिलवस्तु आएका सिडिओ धर्मेन्द्रकुमार मिश्राले जनतालाई कुटपिट गर्न, निर्दोष व्यक्तिहरुलाई जेलमा कोच्ने, सामान्य व्यापारीहरुलाई पक्राउ गरि प्रहरीलाई बुझाएर अनावश्यक दु:ख दिनेजस्ता क्रियाकलाप गरेको आरोप लगाउँदै स्थानीयले चर्को गुनासो गर्न थालेपछि यो विषय बाहिर आएको हो ।

Advertisement 1

सिडिओ मिश्राकै निर्देशनमा कपिलवस्तु प्रहरीले एक निर्दोष व्यक्तिलाई पक्राउ गरि सार्वजनिक मुद्धा दर्ता गरेपछि पीडित परिवार छुटाइदिन आग्रह गर्दै जिल्ला प्रशासन धाउने थालेको धेरै भैसक्यो । सिडिओ मिश्रालाई शारीरिक व्यायाम सिकाउनले तौलिहवाका स्थानीय सनवर अलि मुसलमानको अनुरोधमा उनकै छिमेकी सन्दीप कहारलाई प्रहरीले पक्राउ गरि मुद्धा दर्ता गरेको आरोप पीडित पक्षको छ । सनवर कँहारबीच भदौ ९ गते बेलुका सामान्य भनाभन भएको थियो । त्यहि निहुँमा मुसलमानले आफू सिडिओको गुरु भएकाले जेल हाल्ने धम्की दिएका थिए । नभन्दै भोलिपल्टै सनवरले लगेको जाहेरी तत्कालै प्रहरीले दर्ता गरि सन्दीपलाई समातेर थुनामा राखेको छ ।

जिल्ला प्रहरी कार्यालय मुद्धा फाँटका प्रहरी निरीक्षक रेशम पौडेलले गाली बेइजतीसम्बन्धी जाहेरी आएपछि मुद्धा दर्ता गरि पक्राउ गरिएको र ७ दिनको म्याद थप गरेर अनुसन्धान थालिएको जानकारी दिए । कर्तव्य ज्यानसम्बन्धी उधोग, बलात्कार प्रयास, अपहरण तथा शरीर बन्धकजस्ता जघन्य अपराधका घटना गाउँमै छलफल गरि मिलापत्र गराउने प्रहरीले सामान्य भनाभनको विषयलाई चर्काएर मुद्दा चलाउने र सिडिओबाट सात दिनको म्याद थप गरि एक व्यक्तिलाई हिरासतमा राख्नुलाई स्थानीयले पनि शंकास्पद भनेका छन् । प्रहरी श्रोतका अनुसार सिडियो मिश्र आफैँले प्रहरीमा यसबारे मुद्धा चलाउन र पक्राउ गर्न दबाब दिएका थिए । सिडिओ मिश्रलाई व्यायाम सिकाउने गुरु सनवल १३ बर्षअघि छिमेकी बालिका बलात्कार मुद्धामा पक्राउ परि १२ वर्ष जेल जीवन काटेर हालैमात्र कारागार मुक्त भएका विवादित पात्र हुन् ।

Advertisement 2

त्यतिमात्र होइन गत साउन १९ गते बिहीबार राती १० बजेदेखि बजार डुल्दै सिडिओ मिश्राले सर्वसाधारणलाई धम्क्याएको र आफ्नो पिएसओमार्फत कुट्न लगाएको पनि स्थानियको आरोप छ । तौलिहवा तिलौराकोट रेष्टुरेन्टका कर्मचारी सन्तोष खनाल, विन्देश्वर साहु र ग्राहक अमितलाई ‘पसल किन बन्द नगरेको?’ भन्दै उनले धरपकड गरेको र पिएसओ प्रहरी हवल्दार भविन्द्र थापाले कपाल काट्दै गरेका ग्राहक तथा पसले छोटु नाउलाई कुटपिट गरेको स्थानीयबासी बताउछन् ।

त्यहिदिन राति साढे १० बजे सीमा क्षेत्र मर्यादपुर पुगेका सिडिओ मिश्राले २३ बर्षिय अपाङ्ग युवा विजय यादवलाई मोबाइल खेलाएर बसेको भन्दै उनै थापा कुट्न निर्देशन दिएका थिए । त्यसपछि हवल्दार थापाले मरणासन्न हुनेगरी पिटेको स्थानीय यार मोहम्मद मुसलमानले बताए । सिडिओको आदेशमा हवल्दार थापाले स्थानीय होटल कामदार अजय गौड, चिन्टु गुप्ता र सोनु गौडलाई समेत कुटेका थिए ।

त्यसको दुई दिनअघि त्यसैगरी दलबलसहित बाहिर निस्केका सिडियो मिश्रले तस्कर भन्दै बजारमा हिँडेका स्थानीय व्यापारी सुरज ढुंगानाको लु ८४ प ९६४१ नम्बरको मोटरसाइकल र त्यसमा भएका सामान नियन्त्रणमा लिएर प्रहरीलाई बुझाएका थिए । पछि व्यापारीले विल लिएर गएपछि प्रहरीले छाडेको थियो ।

निर्दोष सर्वसाधारणलाई सताउने तिनै सिडिओ मिश्रामाथि मोटो रकम लिएर तस्करहरुको भने संरक्षण गर्ने गरेको आरोप छ । गत जेठमा नदीनाला अनुगमनमा जाँदा शिवराजको सुकबेल नाका र जोकोहरी नाकामा सिडियो मिश्रासहितका सुरक्षा टोलीले नियम विपरित नदीमा चलाइएका मेशिन तथा टिप्पर पक्राउ गरेपनि कारवाही नगरि त्यसै छाडिदिएपछि स्थानीयले आर्थिक चलखेलको आशंका गरेका हुन् ।