काठमाडौं। सरकारले सुदूरपश्चिम र लुम्बिनी प्रदेशको प्रशासनिक नेतृत्वमा फेरबदल गरेको छ। भदौ २५ गते बसेको मन्त्रिपरिषद् बैठकले दुवै प्रदेशका प्रमुख सचिवलाई संघीय तहका महत्वपूर्ण जिम्मेवारीमा सरुवा गर्दै उनीहरूको स्थानमा नयाँ सचिवलाई प्रदेशको प्रशासनिक नेतृत्व सुम्पिएको हो।

Advertisement 1

निर्णयअनुसार सुदूरपश्चिम प्रदेशका प्रमुख सचिव बैकुण्ठप्रसाद अर्याललाई महालेखा नियन्त्रकको कार्यालयमा सरुवा गरिएको छ। प्रदेशको प्रमुख सचिवका रूपमा जिम्मेवारी सम्हाल्दै आएका अर्याल अब संघीय तहमा आर्थिक प्रशासनसँग जोडिएको महत्वपूर्ण जिम्मेवारीमा जाने भएका छन्।

अर्यालको स्थानमा उत्तरकुमार खत्रीलाई सुदूरपश्चिम प्रदेशको प्रमुख सचिवको जिम्मेवारी दिइएको छ। खत्रीलाई मन्त्रिपरिषद्को सोही बैठकले नेपाल सरकारको सचिव (विशिष्ट श्रेणी) मा बढुवा गरेको हो।

सचिव बढुवाका लागि सिफारिस समितिले खत्रीसहित कालीप्रसाद पराजुली र रुद्रसिंह तामाङको नाम क्रमशः सिफारिस गरेको थियो। पहिलो नम्बरमा रहेका खत्रीलाई सरकारले सचिवमा बढुवा गर्दै सुदूरपश्चिमको प्रमुख सचिवमा पदस्थापन गरेको हो।

खत्री यसअघि अर्थ मन्त्रालयको राजस्व व्यवस्थापन महाशाखा प्रमुखका रूपमा कार्यरत थिए। अर्थ प्रशासनमा अनुभव हासिल गरेका खत्रीले अब सुदूरपश्चिम प्रदेशको प्रशासनिक नेतृत्व सम्हाल्नेछन्।

त्यस्तै, लुम्बिनी प्रदेशका प्रमुख सचिव कृष्णप्रसाद काप्रीलाई निर्वाचन आयोगको सचिवमा सरुवा गरिएको छ। काप्रीको स्थानमा सचिवमा बढुवा भएका बिनोद बहादुर कुँवरलाई लुम्बिनी प्रदेशको प्रमुख सचिवको जिम्मेवारी दिइएको छ।

ज्येष्ठताका आधारमा हुने २० प्रतिशततर्फ सचिव बढुवाका लागि एकल सिफारिस भएका कुँवरलाई पनि मन्त्रिपरिषद्ले सोही बैठकबाट सचिवमा बढुवा गरेको हो। कुँवर यसअघि राष्ट्रिय समावेशी आयोगका सचिवका रूपमा कार्यरत थिए।

यससँगै सुदूरपश्चिममा अर्यालको ठाउँमा खत्री र लुम्बिनीमा काप्रीको ठाउँमा कुँवर पुगेका छन्। एकैपटक भएको सरुवा, बढुवा र पदस्थापनले दुवै प्रदेशको प्रशासनिक नेतृत्वमा नयाँ संयोजन बनेको छ।

अर्याल महालेखा नियन्त्रकको कार्यालयमा पुगेका छन् भने काप्री निर्वाचन आयोगको सचिवको जिम्मेवारीमा जाने भएका छन्। सचिवमा बढुवा भएका खत्री र कुँवरले अब प्रदेश सरकारको प्रशासनिक नेतृत्व सम्हाल्दै सेवा प्रवाह तथा संघ–प्रदेश समन्वयमा भूमिका निर्वाह गर्नेछन्।