सूचना प्रविधिमन्त्री ज्ञानेन्द्रबहादुर कार्कीले आउँदो १० वर्षपछि दुर्गम भनिएको कर्णाली प्रदेशमा जानका लागि सरकारी कर्मचारीबीच हानथाप हुने दाबी गरेका छन् । उनले सोही अनुसार सरकारले नीति तर्जुमा गरिरहेको दाबीसमेत गरेका छन् ।
प्रतिनिधि सभा अन्तर्गतको विकास तथा प्रविधि समिति बैठकमा उनले यस्तो दावी गरेका हुन । नेपाल टेलिकमको सेवाको गुणस्तर बिषयमा बोल्दै उनले भने जसरी नेपालमा पर्यटन, जलस्रोतको सम्भावना रहेको छ । त्यसरी नै सूचना र प्रविधिको पनि धेरै ठूलो सम्भावना रहेको छ । अब कर्णालीको भविष्य धेरै स्वार्णिम रहेको छ । कर्णालीलाई अहिले दुर्गम, दुर्गम भनिन्छ । १० वर्षपछि सबै कर्मचारी कर्णाली जान हानथाप हुने उनको दावी थियो ।
सूचना र प्रविधिको क्षेत्रबाट नेपालले उल्लेख्य विदेशी मुद्रा आर्जन गर्नसक्ने सम्भावना रहेको भन्दै उनले यो क्षेत्रको विकास गर्न आवश्यक रहेको बताए । नेपालमा सञ्चार प्रविधिको विकास गर्न नीतिगत समस्या नभए पनि कार्यान्वयनको समस्या रहेको मन्त्री कार्कीको भनाई छ । उनले नेपालको पर्यटकीय क्षेत्र, धार्मिक क्षेत्र, विद्यालय र अस्पतालहरूमा निःशुल्क वाईफाई जडान गर्ने योजना पनि सुनाए । आगामी दिनमा नयाँ नीति र कार्यक्रमअनुसार मन्त्रालय अगाडि बढ्ने बताउँदै नेपाल सूचना र सञ्चारको क्षेत्रमा एसियामा नै कमजोर नभएको तर सन्तोष हुने अवस्था पनि नरहेको मन्त्री कार्कीको धारणा थियो ।

Advertisement 1