असार महिना धमाधम असारे विकास र रकम भुक्तानी हुनुपर्ने समय । तर शाखा अधिकृत (इञ्जिनियर)देखि सुई (सहसचिव)सम्मका प्राविधिक फाँटका कर्मचारी काम छाडेर सडकदेखि सिंहदरबारसम्म तताउन थालेपछि ठेकेदारहरुको बिल्लीबाठ भएको छ । हजारौंका संख्यामा कर्मचारीहरु एकै पटक आन्दोलित हुँदा असारे विकास पनि सुस्ताएको छ ।

Advertisement 1

सरकारले गत १५ जेठमा ल्याएको बजेट बक्तव्यमा स्थानीय पूर्वाधार विभाग (डोली) खारेज गर्ने बुँदा समावेश गरिएको थियो । सोही पछि सडकका कर्मचारी आन्दोलनमा उत्रदा एकातिर विकास निर्माणको काम अलपत्र परेको छ भने अर्काेतिर ठेकेदारहरुले समयमा भुक्तानी पाउन सकेका छैनन् । ३४ बर्ष अघि अर्थात ०५५ सालमै सरकारले स्थानीय पूर्वाधार विकास तथा कृषि सडक विभाग (डोलिडार) स्थापना गरेको थियो । संघीयतापछि स्थानीय पूर्वाधार र सडकका काम स्थानीय तहमै हस्तान्तरण भयो । सरकारले त्यतिखेरै डोलीडार खारेज गर्न खोजेको भए पनि सकेन र नाम मात्र परिवर्तन गरी ठोली नामाकरण ग¥र्यो र यस्लाई संघमै राख्यो । अर्थमन्त्री जर्नादन शर्माले ल्याएको बजेट बक्तव्यको ३०५ नम्बरको बुँदामा डोली खारेज गर्ने बुँदा घुसाइएको छ । डोली खारेज भएर सडकमा गाभ्ने सरकारी तयारी छ । खारेज गरिएको डोलीमा सहसचिव तहका २२ कर्मचारीसहित ३ सय ७९ जना प्रावधिक कर्मचारी छन भने सहसचिव सरहका २२ जना छन् ।

Advertisement 2

त्यसरी एकै पटक सयौंका संख्याका कर्मचारी सडकमा आएर गाभिँदा आफ्नो बृत्ति विकासमा गम्भीर असर पर्ने भन्दै सडकका इञ्जिनियरदेखि सहसचिव तहसम्मका कर्मचारी आन्दोलनमा उत्रिएको दुई हप्ता व्यतित भइसकेको छ । सडक विभागमा हाल करिब ७ सय ओभरसियर र माथिल्लो तहका करिब ४ सय ५० जना इञ्जिनियर कार्यरत छन्। तीमध्ये सहसचिव सरहका २१ जना कर्मचारी कार्यरत छन् । उनीहरु कहिले सडक विभाग, त कहिले संघीय मामिला तथा सामान्य प्रशासन र भौतिक पूर्वाधार तथा यातायात मन्त्रालयतिर धर्ना कसिरहेका अबस्थामा भेटिन्छन् ।

डोलीका ३ सय प्राविधिक कर्मचारी सडक विभागमा समायोजन भएको खण्डमा त्यहाँ कार्यरत शाखा अधिकृत(इन्जिनियर)देखि उपसचिव (डीई) र सहसचिव(सुई) सम्म बरिष्ठताका आधारमा डोलीबाटै आएका कर्मचारी बढुवा हुने भएपछि आफूहरुको बृत्तिविकासमा असर पर्ने भन्दै उनीहरु आन्दोलित हुनु परेको सुनाउँछन् । यसरी सडकका भए भरका कर्मचारी आन्दोलनमा उत्रिए पछि एकातिर विकास निर्माणको काम ठप्प छ अर्काेतिर भुक्तानीका फाइलहरु सबै अड्किन पुगेकाले निर्माण ब्यवसायीहरु मारमा परेको गुनासो गरेका छन् । उता डोली खारेज भएर त्यहाँका कर्मचारी भौतिक पूर्वाधारमा छिराएको खण्डमा मन्त्रालयमा कार्यरत १ हजार २ सय प्राविधिक कर्मचारीको वृत्ति विकासमा असर पर्ने भन्दै उनीहरु पनि आगो भएका छन् । यसरी डोलीकै कारण सडक विभाग,भौतिक मन्त्रालयका कर्मचारीहरु असार मासमा एकै पटक आन्दोलित हुँदा एकातिर विकास निर्माणको काम सुस्ताएको छ भने अर्काेतिर ठेकेदारहरुका भुक्तानीका फाइल अड्किन पुग्दा उनीहरु मारमा परेका हुन ।