सरुवा तथा पदस्थापनमा अचेल अनेकन रमिता देख्न पाइन्छ । यस्तो रमिता र विकृती चाहिँ निजामती प्रशासनतिरमात्र होइन,प्रहरी प्रशासनतिर पनि देख्न पाइन्छ समय समयमा । नेपाल प्रहरीमा गत हप्ता बढुवा भएका ३२ जना एसएसपीलाई आज बिहान पदस्थापन गरियो । तीमध्ये एकाध घण्टापछि पाँच जनाको काज सरुवा गरिएको छ ।

Advertisement 1

बिहानको पदस्थापनमा कर्णाली प्रदेश प्रहरी कार्यालय पुर्याइएका ५ नम्बर वरियताका दानबहादुर कार्कीको साँझ प्रहरी महानिरीक्षकको सचिवालय,नक्सालमा काज सरुवा गरिएको हो ।आजै काज सरुवा गरिएका अन्य एसएसपीमध्ये डम्बरबहादुर बिकलाई गण्डकी प्रदेश प्रहरी कार्यालय,अपराध नियन्त्रण तथा अनुसन्धान महाशाखा पोखराबाट प्रधान कार्यालयको प्रशासन विभागमा ल्याइएको छ । गोविन्द थपलियालाई लुम्बिनी प्रदेश प्रहरी कार्यालय शान्ति सुरक्षा महाशाखा,दाङबाट राष्ट्रिय प्रहरी प्रशिक्षण प्रतिष्ठान महाराजगञ्ज लगिएको छ ।

अरुण पौडेललाई बागमती प्रदेश प्रहरी कार्यालय अपराध नियन्त्रण तथा अनुसन्धान महाशाखा हेटौंडाबाट प्रशिक्षण प्रतिष्ठान महाराजगञ्ज र रेवती ढकाललाई प्रदेश नम्बर १ प्रहरी कार्यालयको शान्ति सुरक्षा महाशाखा विराटनगरबाट प्रधान कार्यालयस्थित अपराध अनुसन्धान विभागमा काज सरुवा गरिएको छ ।