Advertisement 1

नेकपा माओवादी केन्द्रले निर्वाचन आचारसंहिता विपरित एक जना कर्मचारीलाई आफ्नो चुनावी पोस्टरमा राखेर प्रचार गरेको छ । माओवादीले नेपाल विद्युत् प्राधिकरणका कार्यकारी निर्देशक कुलमान घिसिङको तस्बिर राखेर चुनावी प्रचार गरेको हो ।
माओवादी केन्द्रका अध्यक्ष प्रचण्ड र अर्थमन्त्री जर्नादन शर्माको दायाँतिर छेउमा  नेपाल विद्युत प्राधिकरणका कार्यकारी निर्देशक कुलमान घिसिङको फोटो टाँसेर माओवादीले प्रचार थालेको छ । बुधबार एकाबिहानै प्रचण्डको भेरिभाईट एकाउन्टबाट यस्तो तस्विर सार्वजनिक गर्दै माओावदी केन्द्रलाई भोट दिन अपिल गरिएको छ । माओवादीले अध्यारोबाट उज्यालोको यात्रा भन्दै फोटोमा माओवादी केन्द्रलाई भोट गर्न आग्रह गरेको छ ।

घिसिङलाई पाँच बर्ष अघि ०७३ सालमा प्रचण्ड सरकारको पालामा नेपाल विद्युत प्राधिकरणको कार्यकारी निर्देशमा नियुक्त गरेको थियो । सो समयमा उर्जामन्त्री जर्नादन शर्मा थिए । घिसिङकै कार्यकालमा नेपालबाट लोडसेडिङ अन्त्य भएको थियो । जतिखेर प्रधानमन्त्री केपी शर्मा ओली थिए उनले कुलमानको कार्यकाल थपेनन बरु हितेन्द्रदेव शाक्यलाई विद्युत प्राधिकरणमा नियुक्त गरे । शेरबहादुर देउवा प्रधानमन्त्री बनेसँगै माओावादीकै जोडबलमा कुलमान पुन विद्युत प्राधिकरणमा नियुक्त भएका हुन।
निर्वाचन आयोगले हालै जारी गरेको आचारसंहिता अनुसार कुनै पनि कर्मचारी,पदाधिकारीहरुले कसैको पक्ष वा विपक्षमा मत माग्न पाउँदैन । आयोगका एक पदाधिकारीका अनुसार कर्मचारी,संवैधानिक निकायमा बहाल रहेका पदाधिकारी, सार्वजनिक संस्थामा कार्यरत कुनै पनि कर्मचारीले कुनै राजनीतिक दल वा उम्मेदवारको पक्ष वा विपक्षमा प्रचार प्रसारमा संलग्न हुन निषेध गरेको छ । नेपाल विद्युत प्राधिकरण सरकारी निकाय भएका कारण कुलमान घिसिङको तस्विर राखेर प्रचार गर्नु आचारसंहिता विपरित कार्य हुने ती पदाधिकारीले इकर्मचारीसँग बताए ।