टर्कीमा नेपाली श्रमिकका समस्या समाधान गर्न श्रम सम्झौताको पहल गर्ने सरकारको तयारी
काठमाडौं। वैदेशिक रोजगारीका नाममा बिचौलियाको प्रलोभनमा परी ठूलो रकम खर्च गरेर टर्की पुग्ने नेपाली श्रमिक समस्यामा पर्न थालेपछि सरकारले उनीहरूको सुरक्षा र उद्धारका लागि कूटनीतिक पहल अघि बढाउने भएको छ।
Advertisement 1
परराष्ट्रमन्त्री शिशिर खनालले टर्कीमा रहेका नेपाली नागरिकका कन्सुलर सेवा तथा वैदेशिक रोजगारीसम्बन्धी समस्या समाधान गर्न सरकार प्रतिबद्ध रहेको बताएका छन्।
गैरआवासीय नेपाली सङ्घ (एनआरएनए) राष्ट्रिय समन्वय परिषद् टर्कीले बुझाएको ज्ञापनपत्र ग्रहण गर्दै मन्त्री खनालले नेपालीलाई सहज रूपमा कन्सुलर सेवा उपलब्ध गराउन अवैतनिक वाणिज्यदूतमार्फत सेवा प्रदान गर्ने प्रक्रिया अघि बढाइएको जानकारी दिएका हुन्।
Advertisement 2
टर्कीमा नेपाली राजदूतावास स्थापना गर्ने वा दक्षिणपूर्वी युरोपका देशलाई समेत समेट्ने गरी कन्सुलर सेवा विस्तार गर्ने विषयमा सरकारले अध्ययन गरिरहेको उनले बताए।
टर्कीमा रोजगारीका लागि जाने नेपाली श्रमिक बिचौलियाको प्रलोभनमा परी ठगी तथा श्रम शोषणमा पर्ने गरेको उल्लेख गर्दै मन्त्री खनालले सुरक्षित र वैधानिक वैदेशिक रोजगारीका लागि टर्की सरकारसँग द्विपक्षीय श्रम सम्झौता गर्ने सम्भावनाबारे अध्ययन गरिने बताए।
Advertisement 3
समस्यामा परेका नेपालीको उद्धार तथा सहयोगमा एनआरएनएले निर्वाह गरेको भूमिकाको प्रशंसा गर्दै उनले श्रमिकका समस्या समाधानका लागि परराष्ट्र मन्त्रालयले श्रम, रोजगार तथा सामाजिक सुरक्षा मन्त्रालयसँग समन्वय गरेर काम गर्ने प्रतिबद्धता जनाए।
ज्ञापनपत्र बुझाउँदै एनआरएनए टर्कीका अध्यक्ष विनोद पौडेलले टर्कीमा नेपाली राजदूतावास वा नियमित कन्सुलर सेवा स्थापना गर्न माग गरेका थिए। उनले व्यक्तिगत श्रम स्वीकृति बन्द गरी संस्थागत माध्यमबाट मात्र श्रमिक पठाउने व्यवस्था गर्न, श्रम शोषण तथा ठगी नियन्त्रण गर्न र घरेलु महिला श्रमिकको सुरक्षा सुनिश्चित गर्न सरकारको ध्यानाकर्षण गराएका थिए।
त्यसैगरी, टर्कीमा अलपत्र पर्ने नेपाली श्रमिकको उद्धार तथा सहयोगका लागि स्थायी सरकारी संयन्त्र निर्माण गर्न पनि उनले आग्रह गरेका थिए।
मन्त्री खनाल कोप–३१ सम्मेलनमा नेपाली प्रतिनिधिमण्डलको नेतृत्व गर्दै हाल टर्कीमा रहेका छन्।
