गृह मन्त्री बालकृष्ण खाँणले गृहका कर्मचारीहरुलाई खाजा भत्ता उपलव्ध गराउन तयारी भइरहेको बताएका छन् । गृह मन्त्रालय मातहतको नेपाल निजामति कर्मचारी युनियनको ८ औँ विभागीय अधिवेशनमा बोल्दै मन्त्री खाँणले गृह मातहत रहेका बिहान ९ बजेदेखि बेलुका ५ बजेसम्म खुल्ने कार्यालयका कर्मचारीहरूलाई खाजा भत्ता उपलब्ध गराउन पहल गरिरहेको सुनाएका हुन । खाँणले गृह मन्त्रालय अरु मन्त्रालयजस्तो नभइ चौबीसै घण्टा सेवा दिनुपर्ने विशिष्ट खालको रहेको जानकारी दिँदै असहज अवस्थामा पनि दिनरात नभनी काम गर्ने कर्मचारीप्रति सम्मान प्रकट गरे।
गृह मातहतका कार्याल्यहरु २४ सै घण्टा सेवा दिनुपर्नै खालको भएका कारण खाजा भत्ताका लागि बजेट उपलव्ध गराउनका लागि अर्थ मन्त्रालयसँग पहल गरिरहेको पनि उनले सुनाए ।
कार्यक्रममा बोल्दै उनले प्रमुख जिल्ला अधिकारी र जिल्लाका प्रहरी प्रमुखलाई एकैसाथ जिल्ला नछाड्न सर्कुलर समेत जारी भइसकेको जनाए ।

Advertisement 1

कर्मचारीले जनता आउँदा सेवा राम्रो दिन सक्नुपर्नेमा जोड दिँदै गृहमन्त्री खाणले अहिले दुई घण्टा लाग्दै आएको कामलाई डेढ घण्टा र छ घण्टा लाग्दै आएको कामलाई पाँच घण्टामा सम्पन्न गरे पनि सेवाग्राहीमा ठूलो राहत हुनेतर्फ ध्यानाकर्षण गराए।
उनले सरकारले कर्मचारी र कर्मचारीले सरकारलाई गालीगलौज गरेर मात्रै देशको विकास नहुने भन्दै भएका समस्याको समाधान गरेर अघि बढ्नु पर्ने उनले बताए ।
मन्त्री खाँणले मन्त्रालय र मातहतका कार्यालयमा कोही पनि हाकिम कर्मचारी नभइ सबै एकै परिवारका सदस्य रहेको पनि बताए।