उद्योग, वाणिज्य तथा आपूर्ति मन्त्रालयले कर्मचारीको कार्यसम्पादन रिर्पोट सार्वजनिक गरेको छ । मन्त्रालय मातहतका सचिव सहसचिव गरी १५ जनाको कार्यप्रगति रिपोर्ट सार्वजनिक भएको हो । जस्मा गुणस्तर तथा नापतौल विभागका महानिर्देशक विश्ववावु पुडासैनी उत्कृष्ट दह्रिएका छन् । उद्योग, वाणिज्य तथा आपूर्ति मन्त्रालयले अघिल्लो आर्थिक बर्षको कासमू सम्झौताको नतिजा सार्वजनिक गर्दा विगत आठ बर्षदेखि बालाजुस्थित नापतौल तथा गुणस्तर विभागमा अड्डा जमाएर बसेका पुडासैनीले ९२ प्राप्तांक प्राप्त गरेका छन् । कासमु रिर्पोट अनुसार उनले गत आर्थिक वर्षमा कुल १५ वटा योजनाको जिम्मा लिएकोमा ७ वटा योजना सम्पन्न गरेर कुल १०० अंकमा ९२ प्राप्ताङ्क ल्याएका छन् । यस्तै उनले जिम्मा लिएका अन्य ७ वटा योजना सम्पन्न हुने क्रममा रहेको र एउटा योजना शुरु नभएको रिर्पोटमा उल्लेख छ ।
मन्त्रालयका वाणिज्य तथा आपूर्ति सचिव दिनेश भट्टराईले ८० अंक ल्याएका छन्। उनले एक वर्षमा २९ वटा काम गर्ने प्रतिवद्धता जनाएका थिए । त्यसमध्ये १४ वटा मात्र काम सम्पन्न गर्न सके । बाँकीमध्ये १४ वटा काम सम्पन्न हुने क्रममा रहेको र एउटा काम सुरु नै नभएको कार्यसम्पादन मूल्यांकन प्रतिवेदनमा उल्लेख छ ।

Advertisement 1

यस्तै, उद्योगतर्फका सचिव अर्जुन पोखरेलले २२ वटा काम सम्पन्न गर्ने प्रतिवद्धता जनाएका थिए । त्यसमध्ये उनले ११ वटा मात्र काम सम्पन्न गरे । बाँकीमध्ये १० वटा काम सम्पन्न हुने क्रममा रहेको र एउटा काम सुरु नै भएको छैन । उनले ७६ दशमलव ५ प्रतिशत पाएका छन्।
यस्तै सहसचिव तथा उद्योग विभागका महानिर्देशक जिवलाल भुषालले ८९ दशमलव ६ अंक ल्याउँदै मन्त्रालयको आन्तरिक मूल्याङ्कनमा दोस्रो भएका छन् ।
अर्काे सहसचिव प्रकाश दाहालले ८७ अंक, सहसचिव चन्द्रकला पौडेलले ८५ अंक, वाणिज्य, आपूर्ति तथा उपभोक्ता संरक्षण विभागका महानिर्देशक प्रकाश पौडेलले ८३ दशमलव १ अंक प्राप्त अंक ल्याएका छन् ।
यस्तै आपूर्ति व्यवस्था तथा उपभोक्ता हित संरक्षण महाशाखाका प्रमुख प्रेमकुमार श्रेष्ठले ८२ अंक पाएका छन् ।
कासमु रिर्पोट अनुसार,सहसचिव बलराम रिज्यालले ७७ दशमलव ८३ अंक प्राप्त गरेका छन्। अर्का सहसचिव नारायण प्रसाद शर्मा दुवाडीले ७६ अंक प्राप्त गरेका छन् । यस्तै सहसचिव गोविन्द बहादुर कार्कीले ७४ अंक प्राप्त गर्दा खानी तथा भूगर्भ विभागका महानिर्देशक रामप्रसाद घिमिरेले ७० दशमलव ५, कम्पनी रजिष्ट्रार कार्यालयका रजिष्ट्रर प्रदिपराज अधिकारी र मन्त्रालयको द्विपक्षीय तथा क्षेत्रीय व्यापार महाशाखा प्रमुख, सहसचिव डा नारायण प्रसाद रेग्मीले ७० ७० अंकभार पाएका छन् ।
यस्तै लघु, घरेलु तथा साना उद्योग प्रवद्र्धन केन्द्रका कार्यकारी अधिकृत पुष्पराज शाहीले जम्मा ४२ अंक प्राप्त गरेका छन् ।