काठमाडौं। ज्योति विकास बैंकले दुर्गम तथा ग्रामीण क्षेत्रका ५ स्वास्थ्य चौकीलाई बेबी वार्मर मेसिन दिएको छ। जीवनरक्षा गर्ने चिकित्सा उपकरणको आवश्यकतालाई ध्यानमा राखी कर्णाली प्रदेशका ५ स्वास्थ्य चौकीलाई बेबी वार्मर मेसिन दिइएको बैंकले जानकारी दिएको छ।
बेबी वार्मरले नवजात शिशुको शारीरिक तापक्रम उचित राख्न र शिशुलाई हाइपोथर्मिया (अल्पताप) हुनबाट जोगाउन मद्दत पुग्ने विश्वास लिइएको बैंकले बताएको छ।

Advertisement 1

बैंकका अनुसार जुम्ला, कालीकोट, मुगु र दैलेखस्थित स्वास्थ्य चौकी तथा बर्थिङ सेन्टरलाई उक्त उपकरण उपलब्ध गराइएको हो।
‘हाइपोथर्मियाको कारण नवजात शिशुको अकालमा मृत्यु हुन नदिन र जीवनरक्षा गर्न विभिन्न स्वास्थ्य चौकीहरूमा बैंकले उक्त मेसिन जडान गरेको हो,’ बैंकले भनेको छ।

हालसम्म विभिन्न चरणमा मुलुकभर ४३ वटा बेवी वार्मर प्रदान गरेको बैंकले यस चरणमा भौगोलिक रूपले विकट क्षेत्रहरूमा उक्त उपकरण जडान गरिएको बताएको छ। ‘हाइपोथर्मिया पश्चात् जीवन जोखिम र उपचारको लागि २ दिन लाग्ने गरी कच्ची सडकको यात्रा गर्नुपर्ने बाध्यतालाई उक्त उपकरणले निर्मूल गर्न थप सहयोग पुग्ने बैंकले विश्वास लिएको छ,’ विज्ञप्तिमा थप भनिएको छ। बैंकले संस्थागत सामाजिक उत्तरदायित्व प्रयोजनार्थ स्थापना गरेको ‘हाम्रो विकास प्रवर्द्धन कोष’मार्फत सो मेसिन प्रदान गरेको हो।

Advertisement 2

मेसिन जडानपछि जुम्लाको कनकासुन्दरी गाउँपालिका वडा नं. ०३ स्थित विराट स्वास्थ्य चौकी, कालिकोटको तिलागुफा नगरपालिका वडा नं. ०९ स्थित स्वास्थ्य चौकी–चिल्खाया, मुगुको छाँयानाथ रारा नगरपालिका अन्तर्गतको गुम स्वास्थ्य चौकी, दैलेखको डुंगेश्वर गाउँपालिका वडा नं. ०२ स्थित लाँकुरी स्वास्थ्य चौकीका बासिन्दा लाभान्वित भएका छन्।

त्यस्तै डुंगेश्वर गाउँपालिका वडा नं. ०४, अवलपराजुलस्थित डुंगेश्वर आधारभूत स्वास्थ्य तथा सरसफाई सेवा केन्द्रको बर्थिङ सेन्टरमा प्रसूति सेवा लिन आउने प्रत्यक्ष रूपमा लाभान्वित भएका छन्।