काठमाडौं । उपप्रधान एवं गृहमन्त्री रवि लामिछानेले आफ्नो जिम्मेवारीको क्षेत्रमा गलत तत्त्वको सञ्जाल तोड्न कर्मचारीलाई निर्देशन दिएका छन् । बुधबार उनले सरुवा भएका सरकारी अधिकारीलाई यस्तो निर्देशन दिएका हुन् ।

Advertisement 1

गृहमन्त्री लामिछानेले नागरिकमा सरकारको व्यवहारिक अनुभूत गराउने गरी कानुनले प्रत्यायोजन गरेको अधिकारअनुसार काम गर्न समेत कर्मचारीलाई निर्देशन दिए । उनले भने, ‘नागरिकमा सरकारको व्यवहारिक अनुभूत गराउने गरी कानुनले प्रत्यायोजन गरेको अधिकारअनुसार काम गर्नुहोस । सरकारले जनतामा तत्काल आशा जगाउन सक्नुपर्छ । आफ्नो जिम्मेवारीको क्षेत्रमा गलत तत्त्वको सञ्जाल तोड्नुस्, तिनका सहयोगी बन्ने होइन ।’

गृहमन्त्री लामिछानेले सेवा प्रवाहमा तत्कालै सुधारका योजना बनाएर लागू गर्नसमेत निर्देशन दिएका छन् । उनले भने, ‘सेवा प्रवाहमा तत्काल सुधार, गुण्डागर्दी, तस्करी, राजस्व चुहावट र प्राकृतिक स्रोतको दोहन नियन्त्रण, सामाजिक सद्भाव अभिवृद्धि, विपद् व्यवस्थापन, सवारी दुर्घटना न्यूनीकरणलगायत क्षेत्रमा तत्कालै सुधारका योजना बनाएर लागू गर्नुस् ।

Advertisement 2

गृहमन्त्री लामिछानेले कर्मचारी राजनीतिक नेतृत्वको गलत दबाब र प्रभावमा पर्न नहुनेसमेत बताए । उनले भने ‘आज्ञापालक होइन, सृजनशील प्रशासक बन्नुस् । नागरिकबाट मान सम्मान खोज्ने होइन, उनीहरूलाई सेवा गर्नुहोस । औपचारिक कार्यक्रममा धेरै समय बर्बाद नगर्नुहोस । जिम्मेवारी दिँदा नै ‘सक्दिन’ भन्नुहोस, लिएपछि नभाग्नुहोस ।’

गृह मन्त्रालयमा आयोजित कार्यक्रममा गृहमन्त्री लामिछानेले अध्यागमनका समस्या समाधानका योजना ल्याउनसमेत निर्देशन दिए । कार्यक्रममा गृहसचिव एकनारायण अर्यालले सुरक्षा र सेवा प्रवाहमा तत्कालै सुधार गर्न निर्देशन दिए । उनले स्थानीय सरकारसँग समन्वय गरी समयमै निर्णय र रिपोर्टिङ गर्नसमेत कर्मचारीलाई आग्रह गरे ।

गृहमन्त्रालयले अध्यागमन विभागका महानिर्देशक, निर्देशक, अध्यागमन कार्यालय त्रिभुवन विमानस्थल, अध्यागमन कार्यालय गौतमबुद्ध अन्तर्राष्ट्रिय विमानस्थल, राष्ट्रिय विपद् जोखिम न्यूनीकरण तथा व्यवस्थापन प्राधिकरण, गृहमन्त्रालय र केही जिल्ला प्रशासन कार्यालयमा चैत्र ६ गते उपसचिव र सहसचिव गरी २२ जनाको सरुवा गरेको थियो ।