लुम्बिनी प्रदेशका तत्कालीन प्रदेश सचिव बैकुण्ठ अधिकारीसहित चार जना अख्तियार दुरुपयोग अनुसन्धान आयोगको फन्दामा परेका छन् । आर्थिक वर्ष २०७५/७६ मा किसानलाई स्पेसिफिकेशन र सम्झौता विपरीत कम क्षमता र गुणस्तर नभएको मिनिटिलर तथा अन्य यन्त्र उपकरण वितरण गरेर भ्रष्टाचार गरेको भन्दै आयोगले विशेष अदालत, काठमाडौंमा आइतबार आरोपपत्र दायर गरेको हो।

Advertisement 1

अख्तियारले तत्कालीन प्रदेश सचिव बैकुण्ठ अधिकारी, महाशाखा प्रमुख श्रीधर ज्ञवाली, आधुनिक कृषि किसान संसारका प्रबन्ध निर्देशकसहित चार जनाविरुद्ध मुद्दा दायर गरेको हो। अख्तियारका प्रवक्ता भोला दाहालका अनुसार उनीहरुविरुद्ध गैरकानुनी लाभ तथा सरकारी सम्पत्ति हानी पुर्याइ भ्रष्टाचार गरेको आरोपमा मुद्दा दायर भएको हो।

अख्तियारका अनुसार उनीहरुको मिलेमतोमा कम गुणस्तर र फरक ब्राण्डको कृषियन्त्र वितरण गरी प्रदेश सरकारलाई एक करोड ३१ लाख ६० हजार रुपैयाँ बदनियतपूर्वक हानीनोक्सानी पुर्याइएको छ ।अख्तियारले भ्रष्टाचार निवारण ऐन, २०५९ को दफा ८ बमोजिमको कसुरमा चारै जनाविरुद्ध आज विशेष अदालत काठमाडौंमा एक करोड ३१ लाख ६० हजार बिगो कायम गरी सजाय र जरिवाना हुन मागदाबी गर्दै मुद्दा दायर गरेको हो ।