नक्कली भुटानी शरणार्थी प्रकरणमा प्रहरीले दुई जना सरकारी अधिकृतसँग बयान लिएको छ । नेपालीलाई भुटानी शरणार्थी बनाएर मानवतस्करी गर्ने प्रयास भएको घटनामा गृहका अन्य अधिकारीहरु समेत छानबिनमा तानिए रहँदा गोप्य प्रतिवेदन नै गृह मन्त्रालयमा कीर्ते गरेर नाम थपिएको खुलेपछि तत्कालिन गृहमन्त्री र सचिवसँगै अन्य कर्मचारी पनि छानबिनमा परेका हुन ।
जिल्ला प्रहरी परिसर काठमाडौंले टेकुमै बोलाएर गृहका सहसचिव फणिन्द्रमणि पोखरेल र उपसचिव सागरमणि पाठकसँग बयान लिएको हो ।
तत्कालीन समयमा गृहको शान्तिसुरक्षा महाशाखाको प्रमुख रहेका पोखरेल अहिले गृह मातहतै सहसचिवको रुपमा कार्यरत छन् भने पाठक गुल्मीको प्रमुख जिल्ला अधिकारी रहेका छन् । तत्कालिन गृहमन्त्री बालकृण खाण र सचिव टेकनारायण पाण्डेलाई प्रहरीले पक्राउ गरिसकेको छ । बिचौलिया समुहलाई फाइदा हुने गरी विभिन्न निर्णयहरु गरेको पुष्टि भएपछि उनीहरु पक्राउ परेका हुन् । पूर्वसहसचिव बालकृष्ण पन्थी नेतृत्वको कार्यदलले दिएको प्रतिवेदनमा ८ सय ७५ जनाको नाम थपिएको थियो । जसमा सबै नेपाली छन् । त्यही आधारमा एक अर्ब उठाइएको थियो ।
सो प्रतिवेदन गृहको स्थानीय प्रशासन तथा प्रदेश समन्वय शाखामा थियो । शाखाकै कर्मचारीको मिलेमतोमा कीर्ते गरिएको आशंकामा थप कर्मचारी छानबिनमा तानिएका छन् । कीर्ते गरिएको समयमा सहसचिव फणिन्द्रमणि पोखरेल शान्तिसुरक्षा माहाशाखा र उपसचिव सागरमणि पाठक सो शाखाका प्रमुख थिए । हाल उनी गुल्मीका सिडिओ छन् । उनलाई पनि सोधपुछका लागि प्रहरीले बोलाएको छ ।
बालकृष्ण पन्थीको नेतृत्वमा बनेको कार्यदलले बनाएको प्रतिवेदन कीर्ते गरेको प्रकरणमा प्रहरीले उनीहरुसँग पनि बयान लिएको हो ।