लेखक र निर्देशक को हो ? ,थाहा छैन ,
चलचित्र तयार भएको छ,
कथा र दृश्य पुरानै हुन,
दर्शककाे भीड लागेको छ,
नाफा र घाटा त उत्कर्षले देखाउँछ
किनकी,
अहिले मध्यान्तर भएको छ।

Advertisement 1

पात्रहरू फेरिन सक्छन्,
कथा मोडिन सक्छ,
विदूषकहरुकाे कृपा त हुन्छ नै,
नघटेको घटना घट्न सक्छ,
उत्कर्षको अनुमान पनि पर्खनै पर्छ,
किनकि ,
भर्खर मध्यान्तर भएको छ।

कोपिला लागेको फूल, नफूल्न सक्छ,
राती नै आँधी आउन सक्छ,
बिहानीको उमंग त सबैलाई मनै पर्छ ,
रातमा,
प्रकृतिले पनि सघाउन सक्छ,
रात र दिन बुझ्नलाई ,
साँझमा केही पर्खनुपर्छ ,
किनकि ,
अहिले मध्यान्ह भएकाे छ।

Advertisement 2

नायक र खलनायक छुट्टिएकै छैनन,
भूमिका परिवर्तन हुन सक्छ,
निर्देशककै हातमा छ चलचित्र,
पात्रहरूलाई घात हुनसक्छ,
दर्शकहरू न हुन ,रस परिवर्तन हुन के बेर,
आसु झर्न सक्छ, जुत्ता बर्सिन सक्छ
किनकि ,
अहिले मध्यान्तर भएको छ।

कथा नबुझी ढुङ्गा हान्नु हुँदैन,
आँसु झार्नु हुँदैन ,
पात्रलाई नलाग्न सक्छ,
पर्दा च्यातिन सक्छ,
आँशु रित्तिन सक्छ,
थुप्रै चलचित्र हेर्न बाँकी नै छ,
नयाँ कथा लेखिन सक्छ,
जमाना आधुनिक छ,
निर्देशक चिन्न बाँकी नै छ,
कथाको भाषा र भेष पुरै नबुझी
रुनु ,हास्नु, नाच्नु हुँदैन
दृष्टि र दृश्य हेर्न बाँकी नै छ,
किनकि
अहिले भर्खर मध्यान्तर भएकाे छ।