निजामती सेवामा कहिलेकाँही दुर्लभ संयोग जुर्दछ ।

Advertisement 1

जस्तो यस अघि दाजु बहिनी नै नेपाल सरकारका सचिवको रुपमा बहाल थिए । लोकसेवा आयोगबाट गत असार २२ गते निवृत्त भएका महेन्द्र गुरागाईं र हाल स्वास्थ्य तथा जनसंख्या मन्त्रालयको सचिव देवकुमारी गुरागाईं दाजु बहिनी । करिब दुई बर्ष दाजु बहिनी नै नेपाल सरकारको सचिवको जिम्मेवारी निर्वाह गरे । जसमध्ये महेन्द्र अहिले निवृत्त जीवन बिताइरहेका छन् ।
यस्तै अहिले रिटायर्ड भएका गोपी मैनाली र उमेश मैनालीहरु पनि कुनै समय एकै पटक सचिवको जिम्मेवारीमा थिए । लोकसेवा आयोगका अध्यक्ष उमेश मैनाली र गोपीमैनाली दाजु भाइ नै एकै पटक निजामती सेवाका विशिष्ठ पद सचिवका रुपमा सेवा गरेर अहिले निवृत्त जीवन व्यतित गरिरहेका छन् ।
एउटा कालखण्डमा दाजु र अर्काे समयमा भाइ वा बहिनी सचिव पदमा पुगेका अरु पनि भेटिन सक्छ । तर एउटै समयमा सचिव पदमा दाजु भाइ नै बहाल रहेको घटना चाहिँ निजामती वृत्तमा अलि विरलै भेटिन्छ । यस्तै विरलै देखिने घटनाक्रममा यस पटक गोकर्णमणि र नारायणमणि दुवाडी देखा परेका छन् ।

गोकर्ण हाल निर्वाचन आयोगको सचिवको रुपमा कार्यरत छन् भने नारायण तीन महिनादेखि सूदुरपश्चिम प्रदेशको प्रमुख सचिवको जिम्मेवारी निभाइरहेका छन् ।

Advertisement 2

गोकर्णले ०५४ सालमा निजामती सेवामा पाइला राखेका हुन । ५९ सालमा अधिकृतमा उक्लिएका उनी ६७ साल जेठमा उपसचिवमा बढुवा भए ।

सोही बर्ष फागुनमा सहसचिव बन्न सफल भएका दुवाडी १० बर्ष बीचमा गृह,विज्ञान तथा प्रविधि,स्थानीय विकास मन्त्रालय,भूमि सुधार,सञ्चार,बाग्मती प्रदेशको सामाजिक विकास मन्त्रालयमा जिम्मेवारी बहन गरे ।

७७ मंसिरमा सचिवमा बढुवा भए पछि उनी १० महिना मधेश प्रदेशको प्रमुख सचिव हुँदै वीत्त आयोगमा केही समय व्यतित गरेर अहिले निर्वाचन आयोगमा कार्यरत छन् ।

यस्तै ७९ भदौंमा सचिवमा उक्लिएका नारायण शर्मा दुवाडीले १९ बर्ष अघि ०६० सालमा अधिकृतबाट निजामती सेवामा पाइला राखेका हुन ।
उनको पहिलो पोष्टिग मध्यपश्चिम क्षेत्रीय स्वास्थ्य निर्देशनालय,सुर्खेतमा भएको थियो ।
७ बर्षपटि ६७ सालमा उपसचिवमा उक्लिएका नारायण शर्माले उपसचिवको हैसियतमा राष्ट्रपति कार्यालय,वाणिज्य मन्त्रालयमा कार्यरत रहे ।
०६९ सालमा सहसचिवमा बढुवा भएपछि लोकसेवा आयोग,गृह मन्त्रालय ,प्रधानमन्त्री तथा मन्त्रिपरिषद्को कार्यालयमा बिताएका उनले मकवानपुरको प्रमुख जिल्ला अधिकारी चलाए ।
यस्तै गृहकै शान्तिसुरक्षा महाशाखामा बसेर काम गरेका शर्मा प्रदेश सचिवका रुपमा सचिवका रुपमा लुम्बिनी र मधेश प्रदेशमा समेत केही समय बिताएका थिए ।
७९ भदौंमा सचिवमा बढुवा भएसँगै उनको पदस्थापन सूदुरपश्चिम प्रदेशको प्रमुख सचिवको रुपमा भएको छ ।
गोकर्ण र नारायण एउटै आमाको कोखबाट जन्मिएका दाजु भाइ नभए पनि तेह्र दिने (ठूलोबुवा काकाका छोरा )दाजु भाइ हुन ।
यस्तै यस अघि राममणि दुवाडीले सहसचिव पदबाट अवकाश लिइसकेका छन् ।