Advertisement 1

नेपालको शहरी क्षेत्रको जनसङ्ख्या बढेको छ । पछिल्लो दश बर्षमा शहरी क्षेत्रमा बसोकास गर्नेको संख्या झण्डै ५ प्रतिशतले बढेर ६६ दशमलव ०८ प्रतिशत पुगेको तथ्यांक सार्वजनिक भएको छ । २०६८ सालमा शहरी क्षेत्रको जनसङ्ख्या ६३ दशमलव १९ प्रतिशत र ग्रामीण भेगको जनसङ्ख्या ३६ दशमलव ८१ प्रतिशत रहेकोमा जनगणना २०७८ को प्रारम्भिक तथ्याङ्क अनुसार शहरी क्षेत्रमा बसोवास गर्नेको जनसङ्ख्या २०६८ को जनगणनाको परिणामभन्दा बढेको शहरी विकास मन्त्रालयका सहसचिव रामचन्द्र दङ्गालले जनाएका छन् ।

संयुक्त राष्ट्र सङ्घीय मानव बसोबास कार्यक्रम (यूएन ह्याबिट्याट) ले यसै महिना प्रकाशित गरेको विश्व सहरी प्रतिवेदन २०२२ मा उल्लेख भए अनुसार सहरीकरणको प्रक्रिया विकसित राष्ट्रमा धेरै देखिएको छ । ती देशमा कुल जनसङ्ख्याको ७९ प्रतिशत मानिस सहरी क्षेत्रमा बस्दछन् । यो दरले निरन्तरता पाए विकसित देशमा सन् २०५० सम्म सहरी क्षेत्रको जनसङ्ख्या ८७ प्रतिशत पुग्ने प्रक्षेपण गरिएको छ ।

Advertisement 2

सन् २०२० देखि २०२५ सम्म विकसित देशको जनसङ्ख्या वृद्धिदर ० दशमलव ४६ प्रतिशत रहने अनुमान पनि प्रतिवेदनमा गरिएको छ । सन् २०३० देखि २०३५ भित्र विकसित देशमा सहरी क्षेत्रको जनसङ्ख्या ० दशमलव ४० प्रतिशत पुग्ने पनि जनाइएको छ ।

अक्टोबर महिनाको पहिलो सोमवार मनाइने विश्व बसोबास दिवसका अवसरमा संयुक्त राष्ट्र सङ्घीय मानव बसोबास कार्यक्रमले यस्तो प्रतिवेदन सार्वजनिक गरेको हो।