सिंगापुर पुगेका सम्पत्ति विभागको हाकिमको बीचमै सरुवा
सम्पत्ति विभागका महानिर्देशक प्रेम भट्टराई हटाइएका छन् । उनी एउटा कार्यक्रमको सिलसिलामा विदेशमा छन् । उनी गैरकानुनी आम्दानी र स्रोतमाथि नियन्त्रण गर्न भइरहेका प्रयासवारे नेपालको तर्फबाट प्रतिनिधित्व गर्दै सिंगापुर पुगेका हुन । तर कार्यक्रममा भाग लिन बिदेश पुगेका एक जना हाकिमलाई सरकारले यता सरुवा गरिभ्याएको छ । उनलाई सम्पत्ति अनुसन्धान विभागबाट हटाएर प्रधानमन्त्री तथा मन्त्रिपरिषद्को कार्यालयमा तानेको छ ।
Advertisement 1
उक्त कार्यक्रममा भाग लिनका लागि प्रम कार्यालयका कानुनी सचिव धनराज ज्ञवालीसहित भट्टराइ त्यहाँ भाग लिन पुगेका छन् । त्यहाँ सम्पत्ति शुद्धिकरणसम्बन्धी कानुन निर्माण,संशोधन र कार्यान्वयनको अवस्थाबारे छलफल भइरहेको छ तर राज्यको तर्फबाट भाग लिइरहेका भट्टराईलाई हिजै सरुवा गरेर प्रधानमन्त्री तथा मन्त्रिपरिषद् कार्यालयमा तानिएको छ भने उनको ठाउँमा प्रधानमन्त्री कार्यालयका ताराप्रसाद अधिकारीलाई लगिएको छ ।
यसैबीच सरकारले हिजै ५ जना सचिवको सरुवा गरेको छ । जसमा गृह सचिव टेकनारायण पाण्डे प्रधानमन्त्री तथा मन्त्रिपरिषद्को कार्यालयमा पुगेका छन् भने गृहमा विनोद सिंहलाई ल्याइएको छ । सरुवामा परेका पाण्डे आगामी १ असोजमा अष्ट्रेलिया जाने कार्यक्रम तय भइसकेको थियो । उनले हवाई टिकट समेत काटिसकेको जनाइएको छ । अब उनी आगामी १ गते गृहसचिवकै हैसियतमा अष्ट्रेलिया जाँदै छन् ।
