कर्मचारीको कोटा खोसेर मन्त्रीका पुत्रलाई दक्षिणी मुलुक पठाइएको बिषयमा राष्ट्रिय सर्तकता केन्द्रले सम्बन्धित मन्त्रालयलाई स्पष्टीकरण पत्र काटेको छ । गत माघ ३ गते भारतको उडिसा प्रदेश सरकारले आयोजना गरेको युएन हेबिट्यासले आयोजना गरेको साताव्यापी कार्यक्रममा भाग लिन खानेपानी मन्त्री महेन्द्रराय यादवका छोरा सुनिल यादव कर्मचारीको कोटामा भारत पुगेका थिए ।

Advertisement 1

उनीसहित सो कार्यक्रममा भाग लिएर खनेपानी सचिव सुरेश आचार्य, सहसचिवहरु मीना श्रेष्ठ, अर्जुन गौतम, खानेपानी तथा ढल व्यवस्थापान विभागका महानिर्देशक कमलराज श्रेष्ठ, सीडीईहरू रवीन्द्र पोखरेल र रतिश ओझाहरु पुगेर स्वदेश फर्किएका छन् । सुरुमा मन्त्रीको छोराको नाम विदेश भ्रमण गर्ने टोलीमा थिएन। पछि मन्त्रीले आफै आयोजकलाई टेलिफोन गरी आग्रह गरे पछि सुनिलको नाम युएन ह्याविट्यासले राखेको बताइन्छ । सुनिल खानेपानी मन्त्री यादवका स्वकीय उपसचिव  हुन्।

राष्ट्रिय सतर्कता केन्द्रले कर्मचारीको कोटामा मन्त्रीका पिएदेखि सल्लाहकारहरुलाई विदेश भ्रमणमा जान रोक लगाएको भए पनि मन्त्री पुत्र सुनिल उडिसातर्फ पुगेर फर्किएसँगै केन्द्रले सात दिनभित्र स्पष्टीकरण दिन मन्त्रालयलाई मंगलबार पत्र काटेको हो ।

Advertisement 2

‘कार्यक्रम आयोजक तथा प्रायोजकको विवरण, आमन्त्रण गरिएको आमन्त्रित कर्मचारीहरूको विवरण तथा उक्त निकाय/संस्थाद्वारा प्राप्त पत्र, भ्रमणका लागि मनोनयन भएका कर्मचारीहरूको निर्णय गरिएको विवरण, मन्त्रालय तथा मातहत कार्यालयबाट भ्रमणमा सहभागी भएका कर्मचारीहरूको विवरण माग गरेका छौं’ राष्ट्रिय सतर्कता केन्द्रका सचिव राम आधार साहले बताए ।