केशर कार्की

Advertisement 1

एउटा कर्मचारीले निजामती वृत्तमा रहेर ३३ बर्ष सेवा गर्दछ । पाँच बर्ष विशिष्ट श्रेणी (सचिव) बनेर विभिन्न मन्त्रालय र निकाय चलाउँछ र सेवा हद (५ बर्ष) लागेर घर फर्कन्छ तर निजामती कर्मचारीको हिसाब किताब राख्ने पुल्चोकस्थित निजामती किताबखानाले गम्भीर बदमासी गर्दा एक रिटायर्ड सचिवले हण्डर खानु परेको खबर छ । निवृत्त सचिव मोहनकृष्ण सापकोटालाई हो यस्तो हत्तु खेलाइएको । उनलाई किताबखानाको सफ्टवेयरले ६ दिने सचिव देखाइदिए पछि तनावमा परेका हुन ।

७२ असोज २२ मा सचिवका उक्लिएका मोहनकृष्ण सापकोटाले त्यस यताका पाँच बर्ष विभिन्न पाँच वटा मन्त्रालयको सचिव चलाए । गृह,पर्यटन,प्रधानमन्त्री तथा मन्त्रिपरिषद्को कार्यालय,संघीय मामिला तथा सामान्य प्रशासन,भूमि व्यवस्था मन्त्रालय चलाए र अवकाशमा गए ७७ वैशाख १९ मा । तर निजामतीको अभिलेखमा उनलाई ७२ असोज २२ देखि ७२ असोज २८ (६ दिनमात्र) सचिव देखाइदिएसँगै उनी तनावमा परेका हुन । उनीजस्तै तनाव र सास्ती खेप्ने अर्काे सचिव छन महेश दाहाल । उनको हकमा पनि ६ दिने सचिव बनाइएको छ,जबकी उनले निजामती सेवामा झण्डै पाँच बर्ष सचिव चलाएका थिए ।

Advertisement 2

निजामती किताबखानाका हाकिम बाबुराजा श्रेष्ठलाई यस बिषयमा जिज्ञासा राख्दा किताबखानाको सफ्टवेयरमा समस्या आएका कारण यस्तो त्रुटी देखिएको र अहिले समाधान भइसकेको प्रतिक्रिया दिए । उनका अनुसार ती दुबै सचिवहरु ७२ असोज २२ मा सचिवका उक्लिएर २८ गते पदस्थापन भएको थियो । त्यसलाई अहिले मिलाइसकिएको उनको प्रतिक्रिया छ ।