निर्वाचन आयोगले सरकारलाई आगामी भदौं २० भित्रै कर्मचारी सरुवा, काज तथा पदस्थापनको काम टुंग्याउन निर्देशन दिएको छ । आयोगले निर्वाचन प्रायोजनका लागि आवश्यक कर्मचारी व्यवस्थापन गर्ने सन्दर्भमा सरकारलाई ५ बुँदे निर्देशन दिएको हो ।
जस्को बुँदा नम्बर २ मा निर्वाचन प्रायोजनका लागि संघीय निजामती सेवा,प्रदेश निजामती वा स्थानीय तहको स्थायी कर्मचारी र स्थायी शिक्षक अनिवार्य रुपमा खटाउनु पर्ने भएका कारण जिल्ला स्तर र स्थानीय तहमा संरचना भएका नेपाल सरकार वा प्रदेश सरकार वा नेपाल सरकार र प्रदेश सरकारको स्वामित्व वा नियन्त्रणमा रहेका संस्थाको स्वीकृत संगठन सरचना तथा दरबन्दी अनुसार कर्मचारीको पद रिक्त नहुने गरी खटाउने व्यवस्था मिलाउन सरकारलाई निर्देशन दिइएको छ ।
यस्तै बुँदा नम्बर ३ मा जनशक्ति व्यवस्थापनका लागि ०७९ भदौं २० अगावै संघ,प्रदेश र स्थानीय तहमा काज वा कामकाजका लागि खटिइएको कर्मचारीलाई अन्यन्त्र खटाइएको भए पदाधिकार रहेको कार्यालय फिर्ता गर्न समेत सरकारलाई निर्देशन दिइएको छ ।
यस्तै निर्वाचनका काममा खटिने बाहेक अन्य कर्मचारीलाई भदौं २० गतेसम्ममा संघ,प्रदेश र स्थानीय तहको स्वीकृत दरबन्दीको तह र पदनाम बमोजिम सरुवा तथा पदस्थापन भएका कर्मचारीहरुलाई निर्वाचन सम्पन्न नभएसम्म अन्यन्त्र काम काज गर्ने र काजमा पठाउने वा सरुवा नगर्ने समेत सरकारलाई निर्देशन दिइएको छ ।