कुलमानसँग सरकारले माग्यो ४ वर्षयताका ठेक्काको विवरण, विवादित ठेक्काको कारणसमेत उपलब्ध गराउन निर्देशन

प्रेम चन्द, काठमाडौं। नेपाल विद्युत् प्राधिकरणका प्रबन्ध निर्देशक कुलमान घिसिङसँग सरकारले ४ वर्षयताको ठेक्काको विवरण माग गरेको छ। ऊर्जा, जलस्रोत तथा सिंचाइँ मन्त्रालयले कुलमानको दोस्रो कार्यकालमा प्रक्रिया अघि बढाइएका ठेक्काको सम्पूर्ण विवरण माग गरेको हो।

Advertisement 1

ठेक्का प्रक्रियामा कुलमानले बेइमानी गरेको समाचार ईकर्मचारीले निरन्तर प्रकाशन गर्दै आएका विषयलाई नै केन्द्रमा राखेर मन्त्रालयले स्पष्टीकरण सोधेको हो। ‘ठेक्काका विषयमा पनि छन्। मुख्य त ठेक्कामा के भएको रहेछ भनेर नै मन्त्रालयले चासो राखेको हो,’ मन्त्रालय स्रोतले भन्यो, ‘ठेक्कासहित अरु विषय पनि छन्।’

मन्त्रालयका सहप्रवक्ता राजु महर्जनले कुलमानलाई स्पष्टीकरण सोध्ने निर्णय गरिएको पुष्टि गरे। कुलमानलाई ठेक्कासहितका विषयमा १५ बुँदे स्पष्टीकरण सोध्ने निर्णय भएको उल्लेख गरे पनि सम्पूर्ण विवरण भने आफूसँग आइनपुगेको उनको भनाइ थियो। ‘निर्णय मकहाँ त आइपुगेको छैन,’ उनले भने, ‘निर्णय गरिएको थाहा पाएको छु।’

Advertisement 2

बुधबार मन्त्रालयले घिसिङसँग १५ बुँदे स्पष्टीकरण माग गर्दै प्राधिकरणबाट पछिल्लो ४ वर्षयता भएका ठेक्काको सबै विवरण पनि उपलब्ध गराउन भनेको हो। १५ बुँदे स्पष्टीकरणको बुँदा नम्बर ८ मा ठेक्कासम्बन्धी सबै विवरण उपलब्ध गराउन भनिएको छ।

साथै विवादित ठेक्काको विवरण र विवादमा पर्नुको कारण पनि माग गरेको छ। ‘विगत ४ वर्षदेखि त्यस प्राधिकरणका विभाग, निर्देशनालय र कार्यकारी निर्देशकबाट स्वीकृत भएका बोलपत्रसम्बन्धी विवरण (जस्तै ठेक्काको नाम, स्वीकृति भएको रकम, भुक्तानीको विवरण, ती ठेक्कासँग सम्बन्धित दायित्वहरुको विवरण आदि)। साथै यदि विवाद पर्न गएको भए विवादका कारण र कार्य सम्पन्न हुन नसकेका ठेक्का सम्झौताको वर्तमान अवस्था,’ ८ नम्बर बुँदामा भनिएको छ।

Advertisement 3

कुलमान घिसिङले प्राधिकरणमा दोस्रो कार्यकालमा नियुक्त भएयता प्राधिकरणबाट कामकारबाही हुनुपर्ने ठेक्कामा चरम अनियमितता गर्ने गरेका छन्। उनले प्रस्तावदाता कम्पनीको बोलपत्र संशोधन गरेरै र प्रस्तावदाता कम्पनीमा कुनै पनि कैफियत नदेखिए पनि आफूखुसी बोलपत्र अस्वीकृत गर्ने गरेका छन्।