भन्सार कार्यालयमा रहँदा अकुत आर्जन गरेका सुब्बा देबी बहादुर थापाविरुद्ध अख्तियारले विशेष अदालतमा मुद्धा दायर गरेको छ । काठमाडौंको भन्सार जाँचपास परीक्षण कार्यालय तिनकुनेमा कार्यरत रहँदा नासु थापाले अकुत सम्पत्ति जोडेको चार्ज लगाउँदै उनीविरुद्ध विशेष अदालतमा आरोपपत्र दायर गरिएको अख्तियार दुरुपयोग अनुसन्धान आयोगले जनाएको छ । थापाले भन्सार कार्यालयमा हुँदा १ करोड ८७ लाख बढी गैरकानूनी सम्पत्ति आर्जन गर्ने अख्तियारले विशेष अदालतमा आरोपपत्र दायर गरेको छ । अख्तियारले लगाएको आरोपपत्रमा नासु थापाले आफ्नो हैसियतभन्दा बढी रकमले आफू, बुवाआमा र श्रीमतीको नाममा घरजग्गा खरिद गर्नुका साथै कम्पनी तथा फर्महरू दर्ता गरी परिवारले अमिल्दो र अस्वाभाविक उच्च जीवनस्तर यापन गरेको जनाइएको छ ।

Advertisement 1

निजामती सेवामा ०५६ सालमा प्रवेश गरी १९ बर्षको अवधिमा उनले अकुत रकम आर्जन गरी सो रकमले आफु, बाबु, आमा र श्रीमतीको नाममा घरजग्गा खरिद गर्नुका साथै कम्पनी तथा फर्महरु दर्ता गरी परिवारले अमिल्दो र अस्वाभाविक उच्च जीवनस्तर यापन गरेको, परिवारका सदस्यको नाममा विभिन्न बैंक तथा वित्तीय संस्थाहरु तथा कम्पनीहरुका संस्थापक एवं साधारण शेयरहरु खरिद लगानी लगायतका चलअचल सम्पत्तिहरू खरिद, विभिन्न उद्योग तथा फर्महरूमा लगानी, विभिन्न बैंक तथा वित्तीय संस्थाहरूमा रकम जम्मा एवं घर निर्माण लगायतका शीर्षकहरूमा रु ३ करोड ८९ लाख ४५ हजार ५८८.७८ खर्च गरेको देखिँदा निजको वैध आय रु २ करोड १ लाख ९८ हजार ४३९ र अवैद्य तथा स्रोत नखुलेको सम्पत्ति १ करोड ८७ लाख ४७ हजार १४९ रहेको बिगो बमोजिमको जरिवाना र कैद सजाय हुन मागदाबी लिइएको अख्तियारद्धारा जारी विज्ञप्तीमा भनिएको छ ।