सिरहाको एक पालिका अध्यक्ष र कर्मचारीको मिलेमतोमा लाखौं आन्तरिक राजश्वबाट उठेको रकम हिनामिना भएको पाइएको छ ।

Advertisement 1

विष्णुपुर गाउँपालिकाका अध्यक्ष जागेश्वर यादव र नायव सुब्बा महेन्द्रप्रसाद यादवले आर्थिक वर्ष २०७७र७८ मा संकलन गरेको ३४ लाख २३ हजार ७ सय ९० रुपैयाँ हिनामिना गरेको खुलेको हो ।

गाउँपालिका प्रशासन शाखाका नायब सुब्बा महेन्द्रप्रसाद यादवले आर्थिक वर्ष २०७७–०७८ मा गाउँपालिकाको लेखा शाखामा विभिन्न शीर्षकमा सेवाग्राहीबाट राजश्ववापत संकलन भएको ५५ लाख २७ हजार ७७ रुपैयाँमध्ये ३४ लाख २३ हजार सात सय ९० रुपैयाँ राजश्व खातामा दाखिला नगरी हिनामिना गरेको खुलेको हो । नायससुब्बा यादवले स्थानीय तह आय लेखांकन प्रणाली सफ्टवेयरमार्फत २०७७ साउन १ देखि २०७८ असार ३१ गतेसम्म एक वर्षको अवधिमा संकलन भएको रकम बैंक दाखिला नगरी अन्यत्र चलाएको पाइएको प्रमुख प्रशासकीय अधिकृत दीपकुमार यादवले जानकारी दिए ।

Advertisement 2

उनले आफू भर्खरै यो जिम्मेवारीमा आएकोले धरै कुरा थाहा नभए पनि राजस्व रकम बैंक दाखिला नभएको पाइएपछि आफूले तुरुन्त आर्थिक कार्यविधि तथा वित्तीय उत्तरदायित्व ऐन २०७६ बमोजिम २५ प्रतिशत जरिवानासहित ४२ लाख ७९ हजार ३ सय ३७ रुपैयाँ दाखिला गर्न पत्र काटिसकेको बताए । तत्काल रकम जम्मा गर्न निर्देशनसहितको पत्र काटेको उनले बताए ।

हिनामिना गर्ने कर्मचारीको नाममा रकम बुझाउन पत्र काटेको १० दिन बितिसक्दा पनि अझै रकम जम्मा भएको छैन । उनले महालेखा परीक्षणको क्रममा यो कुरा जानकारी हुनासाथ आफूले उनलाई पटक९पटक ताकेता गरेको पनि जानकारी दिए ।

यता नासु महेन्द्रप्रसाद यादवले प्रशासनिक रूपमा आफू दोषी भएको स्वीकार गरेका छन् । ‘प्रशासनिक हिसाबले मैले जिम्मेवारी लिनु पर्छ । तर, रकम आफूले गाउँ पालिका अध्यक्ष अशेश्वर यादवलाई दिएको थिए । मैले त्यस्तो गर्नु गल्ती भयो’ उनले भने ।

यता अध्यक्ष यादवले कर्मचारीले आफूलाई फसाउन खोजेको आरोप लगाएका छन् । अध्यक्ष यादवले भने, ‘मैले कोही कर्मचारीसँग कुनै पैसा लिएको छैन । कर्मचारीहरूले मलाई फसाउन र बदनाम गर्न खोजेका छन् । म योभन्दा बढी अहिले केही भन्दिन । पत्रकारलाई बोलाएरै थप कुरा गर्ने छु,उनले भने ।

घटना सार्वजनिक भएलगत्तै पालिकाका एक वडा अध्यक्षले कोष तथा लेखा नियन्त्रण कार्यालय सिरहालाई जानकारी गराएका थिए । जानकारीपछि कोलेनिकाले पालिकाको खाता रोक्का गरे पनि अध्यक्ष आफै आएर तत्काल रकम जम्मा गर्ने प्रतिबद्धता जनाउँदै खाता खोल्न लगाएको एक कर्मचारीले जानकारी दिए । तर, अझै रकम जम्मा नभएको उनले सुनाए ।