अख्तियारले जिल्ला वन कार्यालय, रसुवाका तत्कालीन जिल्ला वन अधिकृत विष्णुकान्त मिश्रसहित तीन जनाविरुद्ध विशेष अदालतमा मुद्धा दायर गरेको छ ।
मिश्रले रक्तचन्दनको ठेक्का मिलाई दिन्छु भन्दै सत्तरी लाख घुस लिएर फरार भएको भन्ने उजुरी उपर छानबिन हुँदा सेवाग्राहीबाट सत्तरी लाख लिएको पुष्टि हुन आएकोले उनीविरुद्ध विशेष अदालतमा मुद्धा दायर गरिएको अख्तिायरले जनाएको छ ।
यस्तै मिश्रको छोरा नविन कुमार मिश्रको खातामा ४० लाख भेटिएकाले भ्रष्टाचार निवारण ऐन, २०५९ को दफा ३ को उपदफा १ र दफा ३ को उपदफा १ को खण्ड (छ) बमोजिमको कसुरमा बिगो चालीस लाख रुपैयाँ कायम मागदावी गर्दै अख्तियारले विशेष अदालतमा मुद्धा दायर गरेको छ ।

Advertisement 1

तत्कालीन जिल्ला वन अधिकृत बिष्णुकान्त मिश्रलाई घुस रकम उपलब्ध गराई मिलेमतो गर्ने ग्याल्जेन एण्ड तामाङ्ग प्रालि र रसुवा ट्रेडिङ्ग कम्पनीका प्रोप्राइटर लाक्पा ग्याल्जेन आफैले पच्चिस लाख दिएको पुष्टि हुनले उनीबाट पच्चीस लाख रुपैयाँ कायम गरिएको भए पनि लाक्पा ग्याल्जेनको मृत्यु भईसकेको अनुसन्धानवाट खुलेको कारण अपराधीसँगै अपराध मर्दछ भन्ने फौजदारी न्यायको सर्बमान्य सिद्दान्त मुलुकी फौजदारी कार्यविधि संहिता, २०७४ को दफा १३३ र दफा १५८ समेतको कानुनी व्यवस्थाबमोजिम निजलाई कैद र जरिवाना हुन नसक्ने अख्तियारले जनाएको छ ।

अख्तियारले भ्रष्टाचार निवारण ऐन, २०५९ को दफा ४६ तथा फौजदारी कार्यविधि संहिता, २०७४ को दफा १३३ र दफा १५८ बमोजिम मरेको व्यक्तिको हकमा समेत सरकारी वा निजी बिगो क्षतिपूर्ति वा रकम भराउन सकिने कानुनी व्यवस्था रहेकोले निज प्रतिवादीले दिएको घुस रकम जम्मा रु सत्तरी लाख रुपैयाँ भ्रष्टाचार निवारण ऐन, २०५९ को दफा ३ को उपदफा (१) बमोजिम जफत गर्ने प्रयोजनका लागि मात्र निजलाई प्रतिवादी कायम गर्ने मागदावी लिई अख्तियार दुरुपयोग अनुसन्धान आयोगले विशेष अदालतमा मुद्धा दायर गरेको हो ।