सरकारले विशिष्ट श्रेणीका सचिवहरुको सरुवा गरेको छ । सोमबार बसेको क्याविनेटले १० जना सचिवको सरुवा गर्दा पूर्वगृहसचिव महेश्वर न्यौपानेलाई पर्यटन मन्त्रालयमा पुर्याएको छ । न्यौपाने गृहबाट सरुवा भएर प्रधानमन्त्री तथा मन्त्रिपरिषद्को कार्यालयमा लगिएको थियो । न्यौपानेको चार महिनामै सरुवा भएको छ उनी सरकार परिवर्तन भएसँगै गत २५ साउनमा गृहबाट प्रधानमन्त्री तथा मन्त्रिपरिषद्का कार्यालयमा प्ुगेका थिए । यस्तै पर्यटन मन्त्री प्रेम आलेसँगको टसल कारण सचिव यादव कोइरालालाई शिक्षा मन्त्रालयमा लगिएको छ ।
त्यसैगरि संघीय मामिला मन्त्रालयमा निर्वाचन आयोगका सचिव सुरेश अधिकारीलाई सरुवा गरिएको छ । संघीय मामिला मन्त्रालयका सचिव एकनारायण अर्याललाई भने श्रम मन्त्रालयमा पुर्याइएको छ । अर्याललाई गत बर्ष कार्तिक २ गते संघीय मामिला तथा सामान्य प्रशासन मन्त्रालयमा ल्याइएको थियो । अर्याल त्यसअघि काठमाडौं महानगरपालिकामा प्रमुख प्रशासकीय अधिकृतका रूपमा कार्यरत थिए । यस अघि दिनेश थपलिया सामान्य प्रशासनका सचिव हुँदा सोही मन्त्रालयका सहसचिव चलाएका सुरेश अधिकारीले केही समय सोही मन्त्रालयको निमित्त सचिव चलाएका थिए । एक नम्बर प्रदेशको प्रमुख सचिव,अख्तियार दुरुपयोग अनुसन्धान आयोग हुँदै निर्वाचन आयोगमा पुगेका अधिकारी झण्डै दुई बर्ष पछि सामान्य प्रशासनमै फर्किएका छन् ।

Advertisement 1

अर्का सचिव मणिराम गेलाललाई शहरी विकास मन्त्रालयमा सरुवा गरिएको छ । शहरी विकासका सचिव रमेश सिंहलाई त्यहाँबाट हटाइएको छ ।

अर्का सचिव सूर्य गौतमलाइ प्रधानमन्त्री तथा मन्त्रिपरिषद्को कार्यालयमा तानिएको छ । यस्तै शिक्षा सचिव रामप्रसाद थपलिया पनि प्रधानमन्त्री तथा मन्त्रिपरिषद्को कार्यालयमा पुर्याइएको छ ।
प्रधानमन्त्री कार्यालयका सचिव भरतमणि सुवेदीलाई वित्त आयोगमा पठाइएको छ । उनी पनि चार महिना नपुग्दै सुवेदीको सरुवा गरिएको छ। उनी लुम्बिनी प्रदेशको मन्त्रिपरिषद् कार्यालयमा प्रमुख सचिवको जिम्मेवारी सम्हालेर प्रधानमन्त्री कार्यालय आएका थिए।
उता वित्त आयोगमा कार्यरत सचिव गोकर्णमणि दुवाडीलाई निर्वाचन आयोगमा पठाइएको छ । दु्वाडीको एक वर्षमा तेश्रोपटक सरुवा भएको हो। उनी गत साउनमा वित्त आयोगमा सरुवा भएका थिए। त्यसअघि उनी प्रदेश २ का प्रमुख सचिव थिए। २०७७ मंसिरमा दुवाडी सचिवमा बढु्वा भएका थिए।