सरकारले आफूलाई उत्कृष्ट काम गरेको भनेर दावी गर्दै आफ्नो लोकप्रीयता देख्न नसकेर देश भित्र र बाहिरबाट सरकार र ब्यबस्था विरूद्ध गतिविधि हुने गरेको भनेर सरकारका प्रमुखले दावी गरेका छन्। त्यसै गरी सरकारमा जान लाग्दा जहिले पनि छिर्के हान्ने गठवन्धनको सरकारले केही काम नगरेको र काम नगर्ने मात्र हैन दिनदिनै अपराधहरू बढ्दै गएकोले आफ्नो दल बाहेक अरूले केही काम गर्न नसक्ने भन्दै प्रतिपक्षी दलका नेताले चुड्की हान्दै पश्चिम बाट पूर्व तर्फ हानिदै छन् दलबल लिएर।
यो संविधान र यसले अंगीकार गरेको शासन प्रणाली उल्टाउने भन्दै राजा ल्याउन कस्सिएका केही राजावादी समूह र दलहरू सुस्ताउदै सडकमा हिडेको अवस्था एकातिर छ भने आफ्नै छांया देखेर समेत डराएको सरकार यिनीहरू उपर निषेधाज्ञा लगाएर बसेको छ।

Advertisement 1

आफूलाई सफल ठान्ने यही सरकारका पालामा कुईन्टलका कुईन्टल पहेंलो धातु प्रकरण, नक्कली भुटानी शरणार्थी काण्ड, एनसेल प्रकरण, ललिता निवास जस्ता काण्ड छताछुल्ल भएका छन्। भ्रष्टाचारलाई शुन्य सहनशीलतामा ल्याउने, सेवा प्रवाहलाई छिटो छरितो र पारदर्शी बनाउछु भनेर सफथ खाएको सरकारले एक वर्ष पुग्न लाग्दा समेत केही सिन्को नभाचिए पछि गठबन्धन भित्र र बाहिर एकले अर्कोलाई दोष लगाएर बसेका छन्। देशमा देखिएका हरेक कुकृत्यहरूमा कुन सत्ता पक्ष कुन प्रतिपक्ष सबैको मिलीभगत भएको हुदा तै चूप र मै चूपको अवस्थामा छन्। सत्तामा रहेका बखत कुनै पनि राजनीतिक दलले राज्यका संस्थाका रूपमा रहेका निकाय वा अंगहरूलाई दूषित पार्न मै उद्दत रहेका कारण हरेक ठाऊमा राजनीति हावी भएको पाईन्छ। कानूनको शासन संविधानमा मात्र सीमित रह्यो, ब्यबहारमा देख्न सकिएन।

सस्तो र सहज सेवा लिन प्रतीक्षारत सर्वसाधारण पहिला पहिला भन्दा पनि बढी मारमा परेका छन्। पैसा नदिई कुनै पनि कार्यालयबाट सेवा पाउने अवस्था छैन। खेत वारी बांझै छ तै पनि खेती किसानी गरेर खाने किसानलाई समयमा मल, बीऊ, सिंचाई सुविधा पाउन मुस्किल छ, खेतीपाती उब्जनी हुन नपाउदै जंगली जनावरले सखाप पारिदिदा बालीनाली भित्र्याउन पाईदैन, बजारको महंगीले आकाश छोएको अवस्था छ। सर्वसाधारणले बैंकबाट ऋण पाउदैनन्, सहकारीमा जम्मा गरेको रकम अध्यक्षले खाएर भाग्छ, बिभिन्न समस्या संग पौठेजोरी खेलेर उब्जाएको कृषि उत्पादनले बजार पाउदैन, आफ्नो जग्गाको कर तिर्न नसक्ने गरी घर जग्गाको कर लगाईंएको छ। यस्तो परिस्थिति हुदाहुदै अभिभावकको रूपमा रहनु पर्ने सरकार रमिते भएर बसेको छ।

Advertisement 2

सरकारले पेश गर्ने बजेटमा साधारण खर्च झण्डै ७५% छ जुन रकम तलब भत्ता जस्ता शीर्षकमा खर्च हुन्छ। विकास निर्माण कार्यमा लगानी गर्न सरकार संग बजेट हुदैन। देशको आन्तरिक श्रोतले साधारण खर्च समेत थेग्ने स्थिति छैन, राजनीतिकर्मी र कर्मचारीको तलव भत्ता र पेन्सनका लागि पनि विदेशको सहयोग लिनु पर्ने स्थितिमा सरकार पुगेको छ। देश विकासको नाममा राखिएको संघीयता खर्च कै कारण धान्न नसकिने अवस्थामा पुगी सक्यो।

सरकारका यी र यस्तै कमजोरी देखेर जनताले पुराना नेता र दलहरूलाई नरूचाएर नयां दल र स्वतन्त्र उम्मेद्वारलाई जिताउन थाली सके तर पनि सरकारले चेतेको छैन, सरकार मात्र हैन प्रतिपक्षीले पनि नचेतेर अझै मिशन ८४ भन्दै छन् दुबै थरी। दर्हो नेता अगाडि सरेर सरकारका यी वेथिति र विसंगति लाई माध्यम बनाएर आन्दोलन गर्ने हो भने यी लाखापाखा लाग्न ८४ दिन पनि लाग्दैन, मिशन ८४ को त कुरै नगरे हुन्छ।

अहिले नेपालमा राजनीतिक दलहरू एक दर्जन भन्दा बढी छन् तर नेपालीको मन एउटाले पनि बुझ्न सकेका छैनन् र भविष्यमा पनि बुझ्लान भन्ने लागेको छैन। त्यस माथी यी दलका टाउकेहरूको त झनै नामै सुन्न चाहेका छैनन् जनताले। यी टाउकेको गुणगान गर्ने भनेको यिनका आसेपासे, चाटुकदार र यिनका आडमा कमाउने हरूले मात्र हो। यसरी यिनीहरूले टेक्ने आधार खोक्रो भएको अवस्थामा हुने चुनावले दिने नतिजा यो भन्दा झनै खराव हुन आउछ।

नेपालको राजनीतिक ईतिहांस हेर्दा यहाको राजनीतिक ब्यबस्था र नेताहरूमा नेपाल भन्दा बाहिरको शक्तिको हात माथि पर्ने गरेको छ र यो अवस्था भोलीको दिनमा अबस्य आउने छ।यस्तो परिस्थितिबाट आउने राजनीतिले नेपाल र नेपालीलाई हैन तिनै बाह्य शक्तिको स्वार्थ पूर्ति गर्ने छ र स्वार्थ पूरा भए पछि वा स्वार्थमा आंच आए पछि पूनः ब्यबस्था र नेता फेर्न यही शक्ति लाग्छ। यसरी नेपालमा अस्थीरताको निरन्तरतामा बाह्य शक्ति रमाईरहन्छ। यस्तै अस्थिर वातावरण उनीहरूको लागि अनुकूल हुन्छ। हाम्रा नेता भनाउदाहरू सरकारमा रही रहन चाहन्छन्, त्यसैले यस्ता नेताहरू तिनै बाह्य शक्तिका पात्रको ईशारामा काम गर्छन् जुन काम गराई देश र जनताको हितमा हुदैन।

अन्त्यमा, कुनै पनि देशको राजनीतिमा विदेशीको चासो र स्वार्थ जरूर हुन्छ तर त्यो देशमा राजनीति गर्ने नेताले पहिला आफ्नो देश र जनताको चासो र स्वार्थलाई केन्द्रमा राखेर काम गर्न सक्नु पर्छ। खासमा भन्ने हो भने हामीले त्यस्तै नेताको खोजी र छनौट गर्ने अवस्था आई सकेको छ।