राष्ट्रिय सभाको विधायन व्यवस्थापन समितिले राष्ट्रिय मर्यादाक्रमसम्बन्धी विधेयकमा पारित गरेको छ । सोमबार समितिबाट राष्ट्रिय मर्यादासम्बन्धी विधेयक, २०७९पारित गरिएको हो  । दर्ताको आठ महिनापछि महिनापछि विधेयकको दफाबार छलफल टुङ्गो लागेको हो । परिमार्जनसहित विधेयकको प्रतिवेदन समितिले पारित गरेको मर्यादाक्रममा पहिलो पटक शिक्षकलाई समेटिएको छ । यस अघि नवौँ स्थानमा रहेका सर्वोच्च अदालतका न्यायाधीश घटुवामा परेर  ११औँ नम्बरमा पुर्याइएको छ । यस्तै,काठमाडौंको मेयरको मर्यादा १०औँ वरीयताबाट १७ औंमा पुर्याइएको छ ।

Advertisement 1

मर्यादाक्रममा प्रधानन्यायधीशलाई पाँचौंबाट चौंथौं मर्यादाक्रममा उकालिएको छ । यसअघि प्रस्तावित विधेयकमा प्रधान न्यायाधीशको मर्यादाक्रम पाँचौँ नम्बरमा थियो । पारित प्रतिवेदनमा चौथो नम्बरमा राखिएको हो । सर्वोच्चको न्यायाधीशभन्दा अगाडि प्रदेशका सभामुखलाई राखिएको छ । प्रदेश प्रमुखलाई हालको सातौँ स्थानबाट आठौँमा झारिएको छ । सङ्घीय सरकारका उपप्रधानमन्त्री र प्रदेश प्रमुखको मर्यादाक्रम बराबरी गरिएको छ । सोमबार समितिबाट पारित ‘राष्ट्रिय मर्यादासम्बन्धी विधेयक, २०७९’ मा मुख्यमन्त्री र नेपाल सरकारका मन्त्रीलाई ८ औं नम्बरमा राखिएको छ । तर मुख्यमन्त्रीभन्दा अगाडि नेपाल सरकारका मन्त्रीलाई राखिएको छ ।

Advertisement 2

यस्तै प्रदेश सभाका सभामुखलाई दस र सर्वोच्चका न्यायाधीशलाई ११ औँ स्थानमा राखिएको छ । सबै महानगरपालिका प्रमुखको मर्यादाक्रम अब एकै हुने छ । यसअघि काठमाडौँका प्रमुखको मर्यादाक्रम अघि थियो । उच्च अदालतको मुख्य न्यायाधीश, प्रदेश सरकारको मन्त्री, प्रदेश सभाको उपसभामुख, नेपाल सरकारको पूर्वराज्यमन्त्री, नेपाल सरकारको पूर्वसहायक मन्त्री, प्रदेश सभाको पूर्वसभामुख, संविधान सभाको सदस्य, पूर्वसांसद सबैलाई मर्यादाक्रमको १२ औँ स्थानमा रहने भएको छ ।

नेपाल सरकारको मुख्य सचिव, सङ्घीय संसद्को महासचिव, सर्वोच्च अदालतको मुख्य रजिस्ट्रार, प्रधान सेनापति मर्यादाक्रमको १३ औँ स्थानमा रहने छन् ।

प्रहरी महानिरीक्षक, सशस्त्र प्रहरी महानिरीक्षक, राष्ट्रिय अनुसन्धान विभागका मुख्य अनुसन्धान निर्देशकलाई भने मर्यादाक्रमको १७ औँ स्थानमा राख्ने गरी प्रतिवेदन पारित भएको छ । मर्यादाक्रममा पहिलो पटक शिक्षकलाई समेटिएको छ । प्रदेश सरकार वा स्थानीय तहले नियुक्त गरेका राजपत्राकिंत तृतीय श्रेणी वा सो सरहका अधिकृत,माध्यमिक तह तृतीय श्रेणीका शिक्षक र सहायक सेनानीलाई मर्यादाक्रमको पुच्छरमा राखिएको छ ।गाउँपालिका अध्यक्ष, नगरपालिका उपप्रमुख र माध्यमिक तहका प्रथम श्रेणीका शिक्षकलाई एकै मर्यादाक्रममा राखिएको छ ।