माधवकुमार नेपालले नेतृत्व गरिरहेको सत्तारुढ नेकपा एकीकृत समाजवादी पार्टीका कोशी प्रदेश अध्यक्ष बलदेव चौधरी विरुद्ध भ्रष्टाचार मुद्दा दायर भएको छ। उदयपुरको त्रियुगा नगरपालिकाका तत्कालीन नगर प्रमुखसमेत रहेका चौधरीसहित ४ जनाविरुद्ध अख्तियार दुरुपयोग अनुसन्धान आयोगले बुधबार विशेष अदालतमा भ्रष्टाचार मुद्दा दायर गरेको हो।

Advertisement 1

अख्तियारले चौधरीसहित तत्कालीन निमित प्रमुख प्रशाकीय अधिकृत किरणकुमार कार्की, नायव सुब्बा गुरु ढकाल र ठेकेदार राजेश बछारविरुद्ध राजस्व चुहावट गरी भ्रष्टाचार गरेको आरोपमा भ्रष्टाचार मुद्दा चलाइएको हो। अख्तियार दुरुपयोग अनुसन्धान आयोगका प्रवक्ता भोला दाहालका अनुसार आर्थिक वर्ष २०७८/७९ मा उठ्नुपर्ने राजस्व रकम ६२ लाख ९१ हजार २०४ रुपियाँ र ठेक्का नभएको भरौटे र बलौटे माटो गैरकानुनी ढङ्गले उत्खनन् गरी बिक्री गर्न दिएको राजस्व १८ लाख ४४ हजार १७७ रुपियाँ गरी जम्मा ८१ लाख ३५ हजार ३८२ रुपियाँ राजस्व चुहावट भएको आरोप चौधरीलाई लागेको छ ।

चौधरीसहितको टोलीले आर्थिक वर्ष २०७८७९ मा ढुङ्गा, गिटी, ग्राभेल, रोडा, बालुवा उत्खनन संकलन तथा बिक्री गरी कर उठाउने ठेक्कामा मिलेमतोमा बदनियतपूर्वक राजस्व हानिनोक्सानी गरेको उजुरी परेपछि अनुसन्धान हुँदा उक्त कार्य गरेको पुष्टि भएपछि मुद्दा दायर गरिएको दाहालले बताए।

Advertisement 2

अख्तियारले निश्चल ट्रेडर्स हेटौडाका प्रोपाइटर तथा ठेकेदार राजेश बछारले तत्कालीन नगर प्रमुख चौधरी, तत्कालीन निमित्त प्रमुख प्रशासकीय अधिकृत कार्की र तत्कालीन राजस्व शाखा प्रमुख ढकालसँग मिलेमतो गरी सम्झौताको सर्तविपरीत बोलपत्र र सम्झौता नै नभएको, दरभाउ नै पेश नभएको नदीजन्य पदार्थ उत्खनन र बिक्रीसमेत गरेको खुलेको जनाएको छ।

ठेक्का नै नभएको माटो भरौटे र बलौटे गैरकानुनी ढंगले उत्खनन र बिक्री गर्न दिएको, प्रत्यक्ष(अप्रत्यक्ष सहयोग पुर्‍याएको कारण माटो भरौटे र बलौटेको राजस्व १८ लाख ४४ हजार १७७ रुपैयाँ ९४ पैसा चुहावट भएको पाइएको पनि अख्तियारले जनाएको छ। तत्कालीन नगरप्रमुख चौधरी, कार्की र ढकालले ८१ लाख ३५ हजार ३८२ रुपैयाँ राजस्व चुहावट गरेको आयोगको दाबी छ । यस्तै ठेकेदार बछारले १८ लाख ४४ हजार १७७ रुपैयाँ हिनामिना गरेको आयोगको दाबी छ ।

आयोगले नगरप्रमुख चौधरी, निमित्त प्रमुख प्रशासकीय अधिकृत कार्की र तत्कालीन राजस्व शाखा प्रमुख ढकालविरुद्ध जनही १ करोड ६२ लाख ७० हजार ७६४ रुपैयाँ र बछारविरुद्ध ३६ लाख ८८ हजार ३५५ रुपैयाँ असुल उपरको मागदाबी गर्दै मुद्दा दायर गरेको हो । साथै आयोगले उनीहरूलाई कैद सजायको समेत मागदाबी गरेको छ ।