अख्तियार दुरुपयोग अनुसन्धान आयोगले एक जना लेखा अधिकृतविरुद्ध अकुत आर्जनमा भ्रष्टाचार मुद्धा दायर गरेको छ ।

Advertisement 1

अख्तियारले जलस्रोत अनुसन्धान विकास केन्द्र, पुल्चोक, ललितपुरका लेखा अधिकृत तोरणबहादुर कार्कीविरुद्ध विशेष अदालतमा भ्रष्टाचार मुद्धा दायर गरेको हो ।
५३ साल जेठ १७ गते सार्वजनिक सेवामा प्रवेश गरेका कार्कीसँग  पाँच करोड ७५ लाख ८७ हजार ३ सय सत्तरी रुपैंयाको सम्पत्ति देखिएको,  उक्त सम्पत्तिमध्ये वैद्य आय १ करोड ८ लाख ४८ हजार ५९० मात्र देखिएको र बाँकी ४ करोड ६७ लाख रुपयाँ भन्दा बढी रकमको श्रोत नखुलेको हुँदा उनीविरुद्ध भ्रष्टाचार मुद्धा दायर गरिएको अख्तियारले बताएको छ ।

यसरी अकुत आर्जन गरिएको सम्पत्तिले श्रीमती उर्मिला थापा कार्कीको नाममा राखिएको र श्रीमतीकै नाममा जग्गाहरू खरिद, शेयर खरिद, सवारी साधन खरिद तथा बैंक खाताहरूमा रकम मौज्दात लगायतमा गरिएका खर्चमध्ये स्रोत पुष्टि हुन नसकेको अभियोगपत्रमा उल्लेख छ । अख्तियारले कार्कीको श्रीमतीविरुद्ध मुद्धा दायर गरेको छ ।
उनले सार्वजनिक सेवाको पदमा रहेर आफ्नो पदको दुरुपयोग गरी भ्रष्टाचारजन्य कार्य गरी गैरकानूनी रुपमा आर्जन गरेको र स्रोत नखुल्ने सम्पत्ति आर्जन गरेको अख्तियारको आरोप छ ।