संघीय मामिला तथा सामान्य प्रशासन मन्त्रालयले खटाएको ठाउँमा उपसचिव (प्रमुख प्रशासकीय अधिकृत) नगइदिँदा पालिकाका झण्डै साढे ६ सय कर्मचारीहरुले चार महिनादेखि तलब खान नपाएको गुनासो गरेका छन् । संघीय सरकारले मधेश प्रदेशको महागढीमाई नगरपालिकामा खटाएका उपसचिव (हाकिम) सो स्थानीय तहमा नगइ अटेरी गरेर बस्दा त्यहाँ कार्यरत झण्डै साढे ६ सय कर्मचारी मर्कामा परेका छन् ।

Advertisement 1

सरकारले गत चैत्रमै उपसचिव महेश पाण्डेलाई बाराको महागढीमाई नगरपालिकाको प्रमुख प्रशासकीय अधिकृतको रुपमा सरुवा गरेको थियो । तर संघीय सरकारको निर्णयलाई अटेरी गर्दै पाण्डे लुम्बिनी प्रदेशको स्वास्थ्य मन्त्रालयमा बसेका छनु । संघीय सरकारले स्थानीय तहमा सरुवा गरेको कर्मचारीलाई मुख्यमन्त्रीको कार्यालयले स्वास्थ्य मन्त्रालयबाट यातायात व्यवस्था कार्यालय, सवारी चालक अनुमति पत्र, रुपन्देहीमा सरुवा गरेको छ ।

संघीय सरकारले खटाएको ठाउँमा प्रमुख प्रशासकीय अधिकृत नजाँदा सो स्थानीय तहका  कर्मचारी, शिक्षक, स्वास्थ्यकर्मीसहित ६५८ जना कर्मचारी छन् । उनीहरुले चार महिनादेखि तलब नपाएको गुनासो पोखेका छन् ।

Advertisement 2

चार महिनादेखि प्रमुख प्रशासकीय अधिकृत नहुँदा पालिकाको सबै काम ठप्प भएको छ । बजेट नै फ्रिज हुने स्थितीमा पुगेको छ । अहिले स्थानीयहरु प्रमुख प्रशासकीय अधिकृत माग्दै विरोधमा उत्रिएका छन् । उनीहरुले संघीय मन्त्रालयले प्रमुख प्रशासकीय अधिकृत खटाउन नसकेको भन्दै प्रधानमन्त्री पुष्पकमल दाहाल प्रचण्ड र संघीय मामिला तथा सामान्य प्रशासनमन्त्री अमनलाल मोदीको पुत्लासमेत जलाएका छन् । उनीहरुले प्रमुख प्रशासकीय अधिकृत पठाउन नसक्ने मन्त्री पदमा बस्न नहुने भन्दै नाराबाजी समेत लगाएका थिए ।

उता मेयर उपेन्द्र यादव प्रमुख प्रशासकीय अधिकृत माग्दै सिंहदरबार पुगेका छन् । संघीय मामिला तथा सामान्य प्रशासन मन्त्रालयले गत चैत्र २३ को निर्णय अनुसार महागढीमाई नगरपालिका बाराको प्रमुख प्रशासकीय अधिकृतको रुपमा सरुवा गरेका उपसचिव महेश पाण्डे हालसम्म पनि रमाना लिई खटाईएको कार्यालयमा नजाँदा त्यहाँ समस्या पैदा भएको बताइएको छ ।

पाण्डे प्रदेशको स्वास्थ्य मन्त्रालयमा कार्यरत छन् । संघीय सरकारले उनलाई स्थानीय तहमा सरुवा गरेकोमा उनले सरुवालाई बेवास्ता गरेपछि स्पष्टीकरणसमेत सोधिसकेको अबस्था छ ।

संघीय सरकारले सरुवा गरेकोमा मुख्यमन्त्रीको कार्यालयले चैत २८ गते स्वास्थ्य मन्त्रालयबाट यातायात व्यवस्था कार्यालय, सवारी चालक अनुमति पत्र, रुपन्देहीमा सरुवा गरेको बताइन्छ ।

सोहीबमोजिम पाण्डे उक्त कार्यालयमा हाजिर भएपछि सामान्य प्रशासनले चैत्र २३ गतेको सरुवा अनुसार बाराको महागढीमाई नगरपालिकामा किन नगएको ? भनेर सोधनी गर्दै साता दिन अघि २४ घण्टे स्पष्टीकरण सोधेको थियो ।