अञ्जनकुमार

Advertisement 1

आबश्यकता भन्दा बढी इमान्दार र जनताप्रति बफादार बन्दा सबैको तारो बनिने नमिठो अनुभव छ स्याङ्जा फेदीखोला गाउँपालिकाका अध्यक्ष घनश्याम सुवेदीको । अघिल्लो निर्वाचनमा भारी मतले बिजयी बनेका सुवेदीले थुप्रै जनपक्षीय कार्य गरे बापत गत सम्पन्न निर्वाचनमा झण्डै दण्डित हुन परेन । राम्रो काम गर्दा आफ्नैले खुट्टा तान्न खोजे । त्यस्तै अमिलो अनुभुति त छैन शुक्लागण्डकी नगरपालिका तनहुँका प्रमुख प्रशासकिय अधिकृत लिलाबल्लभ न्यौपानेको तर यो मुलुकमा राम्रो गर्छु भन्नेको भलो नहुने रहेछ भन्ने अनुभुति वा महशुस चाहिँ गरेका छन ।

सुशासन, पारदर्शिता, कर्तब्यनिष्ठ, नागरिकप्रति उत्तरदायित्व लिलाको अबधारणा अनि मेयर कृष्णराज पण्डितको साथ सहयोग । हाकिमको योजनामा कुनै नाइँनास्ती छैन । उस्तै क्रिएटिभ दृष्टिकोण राख्छन् उपमेयर खुम बहादुर बिक (राजु) । नागरिक सेवामा टेवा पुग्ने हेतुले केही महिना पहिले संचालक गरेको नागरिक डेस्क अभियानले राष्ट्रिय चर्चा पायो । नागरिकलाई छिटो छरितो र सर्बसुलभ सेवा कसरी प्रदान गर्न सकिन्छ भने कुरामा नयाँ नयाँ प्रयोग गर्ने क्रममा न्यौपानेले जनप्रतिनिधिको एक सयदिन पुगेको अबसरमा अर्को नयाँ प्रयोगको शुरुआत गरे । उक्त प्रयोगले तनहुँको शुक्लागण्डकी नगरपालिकामा भए गरेका गतिविधिलाई पारदर्शी बनाउने कुरामा थप मद्दत पुग्ने मेयर पण्डितको बुझाइ छ ।

Advertisement 2

गत आईतबार जनप्रतिनिधिको एक सयदिन पूरा भएको अवसरमा नगरपालिकाले पारदर्शी भित्तो सञ्चालनमा ल्याएको छ । नगरका हरेक गतिविधि जनताले थाहा पाउन भन्ने हेतुले संचालित पारदर्शी भित्तोले सुचनाको हकलाई प्रतिनिधित्व गर्ने उप मेयर खुमबहादुर बिकको दाबी छ । यो एउटा खुला किताब हो जहाँ जनतालाई लुकाउने, ढाँट्ने, छल्ने कुनै कुरा हुदैन लीला भन्छन । आम नागरिकले स्पष्ट रुपमा नगरपालिकाले के गरेको छ, के कस्ता योजना छन, आगामी योजना के छन्, नीति र निर्णयहरु के भएका छन् भनेर स्पष्ट थाहा पाउन सहज होस् भनेर पारदर्शी भित्तो सञ्चालनमा ल्याइएको पण्डितको कथन छ ।

स्थानीय सरकार एउटा जिम्मेवार र आफ्नो कार्यबधिसम्मको स्थायी सरकार हो । सरकारले गरेको हरेक काम नागरिकले थाहा पाउनुपर्छ र अधिकार पनि हो । अहिलेसम्म सामान्य जानकारी लिन पनि निवेदन दिनुपर्ने पर्थ्यो, तर शुक्लागण्डकी नगरपालिकाले निवेदन दिएर सूचना दिने परिपाटीलाई अन्त्य गरेको छ । पारदर्शी भित्तोले नागरिक र स्थानीय सरकार बीचमा हुने कटुतालाई निस्तेज पार्दै सुमधुर सम्बन्ध कायम गराउन समेत् महत्वपूर्ण भुमिका निर्वाह गर्ने उनको दावा छ तर यसको मुख्य मक्सत सुशासन कायम गराउनु नै भएको अर्का अधिकृत लक्ष्मण लम्साल बताउँछन् ।

यस पारदर्शी भित्तोमा नगरपालिकामा हुने दैनिक सूचना कार्यक्रम, मासिक आय व्याय विवरण, वैठक र त्यसले गरेका निर्णयहरु, लेखापरीक्षणको प्रतिवेदन, नगरसभा कार्यपालिकाको बैठकका निर्णयहरु लगायत विविध सुचनाहरु पारदर्शी भित्तोमा प्रकाशित गरिने नगर प्रबक्ता सचिन भुजेलले जानकारी गराएका छन।