Advertisement 1

पछिल्लो समय निजामती वृत्तमा पुरस्कार र तक्माको इज्जत घट्दो छ । तक्मा र पुरस्कार थाप्नेहरुले त्यसलाई जोगाउन नसक्दा यस्को गरिमा खस्कन थालेको छ । सिफारिस समितिले पनि उत्कृष्ट कार्यसम्पादन गर्ने कर्मचारीलाई हेरेर होइन कि आफ्नो दलको हो वा होइन भन्ने आधारमा नाम सिफारिस गर्दा पुरस्कार र तक्माको गरिमा ओरालो लाग्न थालेको छ ।
न्यसमाथि हाम्रो सिष्टम कस्तो बनाइएको छ भने उत्कृष्ट कार्यसम्पादन गर्ने कर्मचारी खोज्ने होइन,तीनले म पुरस्कार पाउनका लागि योग्य छु भन्दै आवेदन दिनुपर्ने परिपाटी छ । यही परिपाटीकै कारण योग्य,इमान्दार र स्वाभिमानी कर्मचारीहरुले पुरस्कार पाउ भन्दै आवेदन हाल्न जाँदैनन् ।
यस बर्ष पनि सरकारले ४० जना कर्मचारीलाई पुरस्कार बाड्यो । जसमा अधिकांश सत्ताधारी दल निकटका कर्मचारीको बोलबोला देखिन्छ । लाख हाराहारी कर्मचारीमध्ये बाट एक जना सर्वोत्कृष्ट कर्मचारी नभेटिनुले एक जना पनि सर्वोत्कृष्ट काम गर्ने कर्मचारी रहेनछन् त भन्ने प्रश्न उब्जिएको छ ।
उसो त यस अघि यो पुरस्कारबाट अहिलेका सचिव सुर्यप्रसाद गौतम (तत्कालीन हाकिम शैक्षिक जनशक्ति विकास केन्द्रका कार्यकारी निर्देशक ) ले पाएका थिए । सरकारी कर्मचारीहरु मध्ये सबैभन्दा राम्रो काम गरेको भन्दै २ लाख रुपियाँ पुरस्कार पाएका उनैले आफ्नो श्रीमतीको कपि आफैले जाँच गरेर बढी नम्बर दिएर पास गराइदिएका थिए ।

शिक्षा सेवा, शिक्षा प्रशासन समूह अन्तर्गतको विद्यालय निरीक्षक पदका लागि लिएको लिखित परीक्षामा हजारौँ सहभागीलाई पछाडि पारेर आफ्नै पत्नी इन्दिरा ढकाल गौतमलाई उत्र्तीण गराएका थिए । यस्तै बदमासीका कारण हो सर्वोत्कृष्ट कर्मचारी छनौंट गरेर पुरस्कार वितरण हुन छाडेको । २ लाखको राशीको पुरस्कार वितरण हुन छाडेको ६ बर्ष भइसकेको छ ।

Advertisement 2

यस्तै पदकको हाल पनि उस्तै देखिन्छ ।गत वैशाख १ गते राष्ट्रपति विद्यादेवी भण्डारीको हातबाट मानपदवी थापेकी एक कर्मचारी दुई साता नबित्दै घुस सहित पक्राउ परिन । उनी हुन लेखा महत्त पनेरु । उनी जिल्ला मालपोत कार्यालय ताप्लेजुङका अधिकृतको रुपमा कार्यरत रहँदा डेढ लाख घुसरकमसहित पक्राउ परेकी हुन । अख्तियारबाट खटिएका कर्मचारीले अधिकृत पनेरुलाई एक लाख ५० हजार घुससहित पक्राउ गरेर विशेष अदालतमा मुद्धा समेत दर्ज गरेको अबस्था छ ।

पनेरुलाई सोवाग्राहीबाट लिएको रु एक लाख ५० हजारसहित नियन्त्रणमा लिएको जनाएको छ । बाबुका नामको जग्गा दाखेल खारेज गरी नयाँ लगत दर्तासहित छोराका नाममा पास गरिदिएबापत सेवाग्राहीबाट रु एक लाख ५० हजार रकम लिएको अभियोग लागेको छ । उनी वैशाख १ गतेमात्र राष्ट्रपति विद्यादेवी भण्डारीले प्रवल जनसेवा श्री चतुर्थबाट पुरस्कृत भएकी थिइन ।

हरेक बर्ष २२ भदौं अर्थात निजामती दिवसका दिन ३० लाई निजामती पुरस्कार र बाँकी १० लाई उत्कृष्ट निजामती पुरस्कार दिँइदैं आएको छ । यस्तै संविधान दिवसका अवसर पारेर ३ असोजमा झण्डै पचासदेखि ६० निजामती कर्मचारीहरुले विभिन्न प्रकारका तक्मा पाउँदै आएका छन् । यसरी तक्मा र पुरस्कार भनेको जागिरे जीवनमा उस्ले गरेको योगदानको कदर हो र बाँकी सेवा अवधिमा पनि उत्कृष्ट सेवा प्रदान गरोस भन्ने हो तर तक्मा र पुरस्कार पाएपछि निजामती क्षेत्रको झनैं गरिमा बढाउनु पर्ने गर्वका पात्र बन्नुपर्ने कर्मचारीहरुको काम गराई उल्टै सूर्यप्रसाद गौतम र लेखा पनेरु महतको जस्तो भयो भने कहाँ रह्यो र तक्मा र पुरस्कारको गरिमा ?