राष्ट्रपति विद्यादेवी भण्डारीले नवनियुक्त प्रधानसेनापति प्रभुराम शर्मालाई फुली लगाइदिएकीछिन् ।  बिहान ११ बजेको साइतमा दर्ज्यानी चिन्ह लगाइएको हो । समारोहमा प्रधानमन्त्री एवं रक्षामन्त्री शेरबहादुर देउवा, प्रधानन्यायाधीश चोलेन्द्रशम्शेर राणा, सभामुख अग्निप्रसाद सापकोटा र राष्ट्रियसभा अध्यक्ष गणेशप्रसाद तिमिल्सिना उपस्थित थिए ।

Advertisement 1

मुलुकको प्रमुख सुरक्षा अंग नेपाली सेनाको ४४औं प्रधानसेनापतिका रूपमा शर्माले ३ वर्षे कार्यकालका लागि बिहीवारैदेखि औपचारिकरूपमा सैनिक नेतृत्वको जिम्मेवारी सम्हाल्दैछन् । राष्ट्रपति भण्डारीले सरकारको सिफारिसमा उनलाई भदौ ११ गते बिहीवारदेखि लागू हुने गरी प्रधानसेनापतिमा नियुक्त गरेकी हुन् । नवनियुक्त प्रधानसेनापति शर्माले जंगी अड्डामा निशान भगवतीको पूजार्चना गर्नेछन् । उनको सम्मानमा  सैनिक टुकडीले प्रधानसेनापति सम्मान गारत अर्पण गर्नेछ ।

यसअघिका प्रधानसेनापति पूर्णचन्द्र थापाको ३ वर्षे कार्यकाल बिहीवारै सकिएको छ । उनको सम्मानमा बिहीवार सैनिक मुख्यालय टुँडिखेलमा स्वागत समारोह आयोजना हुनेछ ।

Advertisement 2

महारथी शर्माले भारतबाट राष्ट्रिय प्रतिरक्षा, संयुक्त राज्य अमेरिकाबाट आतंकवाद एवं सुरक्षा, थाइल्याण्ड र पाकिस्तानबाट प्रतिरक्षा तथा बंगलादेशबाट शान्ति सेनासम्बन्धी उच्चस्तरीय तालिम प्राप्त गरेका छन् । युद्धकार्य महानिर्देशक, बलाधिकृत र बलाध्यक्षको जिम्मेवारी सफलतापूर्वक पूरा गरेका शर्मा राष्ट्रिय तथा अन्तरराष्ट्रिय सुरक्षासम्बन्धी समसामयिक समस्या तथा चुनौतीबारे पूर्ण जानकार छन् ।

उनले संयुक्त राष्ट्रसंघको शान्ति मिशनअन्तर्गत पूर्वी टिमोरमा गुल्म र कंगोमा गणको अन्तर्राष्ट्रिय कमाण्ड गरेका थिए ।

त्रिभुवन विश्वविद्यालयबाट इतिहासमा स्नातकोत्तर र भारतको मद्रास विश्वविद्यालयबाट प्रतिरक्षा तथा रणनीतिक शास्त्रमा एमफिल गर्नुभएका शर्मासँग सरल स्वभाव, स्पष्ट अभिव्यक्ति र ठोस निर्णय गर्ने क्षमता छ । सेनाको तीन जोड एक अवधारणाको पुनर्संरचनालाई व्यवस्थित कार्यान्वयन गर्नु उनको प्रमुख कार्यभार रहनेछ ।