परीक्षामा अनुत्तीर्ण भएपछि प्रिन्सिपल र होस्टल इन्चार्जले विद्यार्थी कुटेर विद्यार्थी घाइते बनाएका छन् ।
गोकर्णेश्वर नगरपालिकाको नयाँबस्तीस्थित बुद्ध एकेडेमी बोर्डिङ स्कुलका प्रिन्सिपल निर्मलबहादुर तामाङ र होस्टल इन्चार्ज सुनीलकुमार योञ्जनले कक्षा ९ मा पढ्ने १७ वर्षीय हीरा केसीलाई घाइते बनाएका हुन् । उनीहरुले रड, पाइपलगायतले कुटपिट गरेका उनका छिमेकका दाइ मिलन बुढाथोकीले दाबी गरे । कुटाइबाट केसीको अनुहार, घाँटीमा चोट लाग्नुका साथै शरीरका विभिन्न भागमा नीलडाम छन् । उनको सिनामंगलस्थित काठमाडौं मेडिकल कलेजमा उपचार भइरहेको छ ।
विद्यालय प्रशासनले शुक्रबार बिहान १० बजे परीक्षाको नतिजा प्रकाशन गर्‍यो । अनुत्तीर्ण विद्यार्थीलाई तामाङ र योञ्जनले पाइपले पिट्न थालेपछि हीराले नपिट्न आग्रह गरेका थिए । ‘सर बच्चालाई किन पिट्नु भएको, यसरी नपिट्नुस् भन्दाखेरि उसैमाथि कुटेछन्, रडले पिटेको डाम शरीरभरि छ,’ मिलनले भने । हीरालाई कुटपिट गर्नेमाथि कारबाही गरी उपचार खर्चसमेत दिलाइपाऊँ भनी महानगरीय प्रहरी वृत्त बौद्धमा उनले जाहेरी दिएका छन् ।

Advertisement 1

बौद्ध प्रहरी वृत्तका डीएसपी नवीन कार्कीले घाइते विद्यार्थीसँग सोधखोज गरी अनुसन्धान अघि बढाउने बताए ।