काठमाडौं । गृहसचिव एकनारायण अर्यालले त्रिभुवन अन्तर्राष्ट्रिय विमानस्थलस्थित अध्यागमन कार्यालयको आकस्मिक निरीक्षण गरेका छन् । उनले प्रस्थान र आवगमनका दुवै कक्षसँगै कार्यालयको निरीक्षण गरेका हुन् । यात्रु प्रस्थान गर्ने तर्फबाटै यात्रुकै रुपमा विमानस्थल छिरेका अर्यालले एयरलाइन्सका काउन्टर, लबी, अध्यागमन, प्रहरी सुरक्षा र सहजीकरणसँगै ब्यागेज कसरी लोड हुन्छ भन्ने सम्मको निरीक्षण गरे ।

Advertisement 1

उनी बुधबार बिहान नौ बजे नै अन्तर्राष्ट्रिय विमानस्थलतिर लागेका थिए । तर, उनी आउने सुुइँको कर्मचारीले पाएका थिएनन् । यात्रुको चेकजाँज हुने क्षेत्रको निरीक्षण गरेका गृहसचिव अर्यालले अध्यागमनमा डेक्स थप्ने लगायत भिआइपी कक्ष, सिसी क्यामरा, कर्मचारीको कार्यकक्षसँगै अध्यागमन र सुरक्षा अवस्थाबारेसमेत निरीक्षण गरेका छन् ।

आकस्मिक निरीक्षणमा पुुगेका गृहसचिव अर्यालले विमानस्थलस्थित काममा खटिएका अध्यागमन अधिकृतसँग सेवा सञ्चालनका क्रममा केही समस्या छन् कि ? भनेर सोधेका थिए । उनले कुनै समस्या भए कार्यालय प्रमुखमार्फत् मन्त्रालयमा पठाउन भने । गृहसचिव अर्यालले जिम्मेवारी निर्वाह गर्ने क्रममा सेवाग्राहीलाई सेवा दिने कार्यमा कुनै कन्जुस्याई नगर्न कर्मचारीलाई भनेका छन् ।

Advertisement 2

यसैगरी शसस्त्र प्रहरी बल नेपाल र नेपाल प्रहरीका काममा खटिएका अधिकृतसँग पनि उनले कुराकानी गरेका छन् । भौतिक पूर्वाधारदेखि लिएर जनशक्ति तथा समन्वयबारे समेत चाँसो राखेका गृहसचिव अर्यालले काममा खटिएमा जवानदेखि अधिकृतसम्मका अनुभव र गुनासा सुन्नुुका साथै तत्काल समन्वय गर्नुपर्ने विषयमा कार्यक्षेत्रमा नै सम्बन्धित कार्यालय प्रमुखलाई निर्देशनसमेत दिएका छन् । यात्रु आगमनदेखि कर्मचारी, सुरक्षाकर्मी तथा कार्यालय प्रमुख बस्ने कार्यकक्षसम्मै अनुगमन गरेका गृहसचिव अर्यालले देखिएका स–साना समस्या समाधान गर्न र सरसफाइमा ध्यान दिन सम्बन्धित कार्यालय प्रमुखलाई निर्देशन दिए ।

प्रहरी प्रमुख (आइजीपी) बसन्तबहादुर कुँवर र गृह मन्त्रालयका सहसचिव एवं सुरक्षा तथा समन्वय महाशाखा प्रमुख नारायणप्रसाद भट्टराईसहित अध्यागमन पुगेका गृहसचिव अर्यालले अध्यागमन विभागका महानिर्देशक कोषहरि निरौला, प्रमुख अध्यागमन अधिकृत नरबहादुर थापा, त्रिभुवन अन्तर्राष्ट्रिय विमानस्थल सुरक्षा प्रमुख प्रहरी बरिष्ठ उपरीक्षक (एसएसपी) कृष्णहरि शर्मा, त्रिभुवन अन्तर्राष्ट्रिय विमानस्थल नागरिक उड्डयन कार्यालयका हवाई सुरक्षा महाशाखा प्रमुख बच्चुराम श्रेष्ठ, त्रिभुवन अन्तर्राष्ट्रिय विमानस्थल नागरिक उड्डयन कार्यालयका विजय ढुंगाना लगायतलाई आ–आफ्नो क्षेत्रबाट सेवा प्रवाहलाई चुस्त राख्न निर्देशन दिएका छन् ।

सचिव अर्यालले निर्देशन दिदैँ भने, ‘उपलब्ध स्रोत र साधनको अधिकतम् उपयोग गर्नुस् । जुन–जुन निकायको जे–जे जिम्मेवारी हो, तत्तत् निकायका कर्मचारीले इमान्दार भएर त्यो पुरा गर्नुस् । भएका उपकरणलाई समयमै मर्मत गरी तत्काल सञ्चालनमा ल्याउनुस् । भौतिक पूर्वाधारका मर्मत तथा निर्माणका कार्य छिटो सक्नुस् ।’ राम्रो काममा मन्त्रालयको सधै सहयोग हुने उनको भनाइ छ ।

प्रणालीमामा कहि कतै समस्या भएमा नियमित मर्मत सम्भार र कर्मचारी नियमित उपस्थित भई सेवा प्रवाह गर्नुपर्ने गृहसचिवले निर्देशन दिएका छन् । अर्यालले विभागलाई विमानस्थलमा हुने कार्य प्रविधिमैत्री बनाउन, नेटवर्किङ र अन्तर निकाय समन्वय गरेर प्रभावकारी सेवा सञ्चालन गर्न निर्देशन दिए ।

निरीक्षणका क्रममा गृहसचिव अर्यालले प्रमुख अध्यागमन अधिकृत नरबहादुर थापालाई अध्यागमनमा डेस्क थप्न भएको निर्णय कार्यान्वयमा ल्याउन, भिसा इन्ट्री डेक्स अपडेट राख्न, सबै डेक्समा कर्मचारीको व्यवस्था मिलाउन तथा बिग्रेको सामान तत्काल मर्मत गर्ने व्यवस्था मिलाउन निर्देशन दिएका छन् । कस्टममा एक्सरे मेसिन बनाउने, लगेज आउने बेल्टमा बिग्रिएको मेसिन बनाउने विषयमा अर्यालले निर्देशन दिएसँगै थापाले डेस्क थप्ने विषयमा क्यानबाट र तत्कालै थप्नुपर्ने मेसिन विभागबाट समयमै उपलब्ध गराएमा सहज हुने जानकारी सचिव अर्याललाई गराएका छन् ।

त्रिभुवन अन्तर्राष्ट्रिय विमानस्थल सुरक्षा प्रमुख एसएसपी कृष्णहरि शर्माले विशेष गरी न्यून स्रोत साधन तथा जनशक्तिका बिच बढ्दो सेवाग्राहीको चापलाई व्यवस्थापन गरिहेको जानकारी गराए । अहिले २८ वटा मेसिन सञ्चालनमा रहेका छन् । जुन २४ घण्टा सञ्चालनमा रहन्छन् । जसका लागि तीनवटा सिफ्टमा सञ्चालन गर्दा ८४ जना जनशक्ति आवश्यक पर्छ, तर ६० जना प्रहरीले काम गरिरहेको प्रहरी अधिकारीले जनाएका छन् । त्यहाँ कम्तिमा पनि १०० जना प्रहरी अधिकारी आवश्यक पर्ने बताइन्छ ।

इमिग्रेसनमा यात्रुको चाप बढेकोले डेक्स संख्या थप्ने निर्णय भए पनि कार्यान्वयनमा भने आइसकेको छैन । विमानस्थलमा सुरक्षाका लागि एक्सरे लगायतका आधुनिक उपकरण आवश्यक भए पनि हामी कहाँ भने पुराना र ति पनि बिगे्रको अवस्थामा रहेकाले बेला बेलामा समस्या आउने गरेको छ । साथै एक्सरे मेसिनको पनि कमी छ ।

अर्कोतर्फ एक्सेरे मेसिन चलाउने जनशक्तिको पनि अभाव र चोरी निकासी प्रहरीको दायित्वभित्र पर्ने भए पनि भन्सारमा प्रहरीको उपस्थिति छैन ।
अध्यागमनको डिपाचर तर्फका दुुईवटा काउन्टर तत्काल सुचारु गर्न पनि गृह सचिव अर्यालले निर्देशन दिएका छन् । कर्मचारी हिड्ने बाटोलाई डाइभर्ट गर्ने निर्णय भएको विषय कार्यान्वयमा लैजान गृहसचिवबाट निर्देशन भएको विमानस्थल नागरिक उड्डयन कार्यालयका हवाई सुरक्षा महाशाखा प्रमुख श्रेष्ठले बताए । गृह सचिवको निरीक्षणले ढिलासुस्ती भएका कामलाई छिटो सम्बोधन गराउन दबाब पर्ने श्रेष्ठले बताए ।

गृहसचिव अर्यालको आकस्मिक अनुगमनबाट आफूहरु उत्साहित भएको अध्यागमन अधिकृतको भनाई छ । एक अध्यागमन अकिकृतले भने, ‘यसरी बेला बेला आएर हाम्रा कुरा सुनि दिँदा र यहाँको वास्तविकता बुझिदिँदा हौसला प्रदान हुँदो रहेछ । हामीले सेवाग्राहीलाई कसरी सेवा दिइरहेका छौँ भन्ने कुरा प्रत्यक्ष देखिन्छ पनि ।’

त्रिभुवन अन्तर्राष्ट्रिय विमानस्थल नागरिक उड्डयन कार्यालयका विजय ढुंगानाले माथिल्लो निकायबाट समयसमय अनुुगमन भयो भने कहि कतै कमजोरी भएमा सच्चाउन सहज हुने बताए । उनले भने, ‘कतिपय कमजोरी सधै काम गर्नेले देखेको हुँदैन । थाहा नपाउन सक्छ । यात्रुको गुनासो माथि पुुगेको पनि हुन सक्छ । र गुुनासो माथिबाट सम्बोधन गर्न सहज पनि हुुन्छ ।’

त्यसैगरी फिल्डतहमा काम गर्ने प्रहरी अधिकारी पनि आइजीपीसहितको गृहसचिवको अनुगमनले आफ्ना गुनासा सम्बोधन हुने विश्वास लिएका छन् । त्यसै क्रममा अध्यागमन विभागका महानिर्देशक निरौलाले कार्यालयमा आवश्यक स्रोतसाधन परिपूर्तिका लागि विभाग लागि परेको र स–साना आवश्यकता तत्काल परिपूर्ति गराउने प्रतिवद्धता गृहसचिव अर्याल समक्ष गरेका छन् ।