काठमाडौं । शिक्षा, विज्ञान तथा प्रविधि मन्त्रालयले ‘घातक रोग लागेर उपचाररत शिक्षकबाहेक काजमा रहेका अन्य सबै सरकारी सामुदायिक विद्यालयका शिक्षकको काज फिर्ता गर्ने निर्णय गरेको छ । मंगलबार मन्त्रालयले सचिवस्तरीय निर्णय गर्दै सबै शिक्षकको काज सरुवा फिर्ता गर्ने निर्णय गरेको हो ।

Advertisement 1

शिक्षकलाई विभिन्न अनावश्यक र अस्वाभाविक निकायमा काजमा राखिएको र त्यसले अध्ययन अध्यापनमा समस्या परेको गुनासो मन्त्रालयमा आएपछि शिक्षा, विज्ञान तथा प्रविधिमन्त्री सुमना श्रेष्ठले घातक रोग लागेका बाहेक सबै काज फिर्ता गर्ने निर्णय गरी यथाशीघ्र कार्यान्वयन गर्न निर्देशन दिएकी थिइन् । शिक्षकलाई अध्ययन अध्यापन बाहेक अन्य कार्यमा लगाउन नहुने आवाज उठ्दै आएको छ ।

विश्वविद्यालयको अतिक्रमित जग्गा फिर्ता ल्याउन उच्चस्तरीय समिति गठन गरिने

Advertisement 2

यसैविच शिक्षामन्त्री श्रेष्ठले त्रिभुवन विश्वविद्यालय लगायत शिक्षण संस्थाको जग्गा जमिन अतिक्रमणबारे अध्ययन गर्न उच्चस्तरीय छानबिन समिति गठन गर्ने बताएकी छन् । मंगलबार त्रिविको निरीक्षणमा पुगेकी उनले जग्गा जमिन अतिक्रमणका बारेमा उच्चस्तरीय टोली बनाएर अध्ययन गरी कारबाही गर्ने बताएकी हुन् ।

त्रिविको एक हजार भन्दा बढी रोपनी जग्गा विभिन्न व्यक्ति, संघसंस्थाले अनाधिकृत रूपमा कब्जा गरी भोगचलन गर्दै आएका छन् । त्यसलाई फिर्ता ल्याउन सरकारी तहबाटै प्रयास गर्ने विश्वविद्यालयको सहकुलपति समेत रहेकी मन्त्री श्रेष्ठले प्रतिबद्धता जनाएकी हुन् । उनी सामु त्रिवि सामान्य प्रशासन महाशाखाका प्रमुख राजुकुमार श्रेष्ठले जग्गा फिर्ता लिन सरकारी तहबाटै सहयोग आवश्यक रहेको बताएका थिए । जग्गा, जमिनको विषय मालपोत, नापी लगायत अन्य सरकारी निकायसँग पनि सम्बन्धित रहेकाले सरकारले पहल गरिदिनुपर्ने उनको भनाई थियो ।

त्रिविका उपकुलपति केशरजंग बराल लगायत पदाधिकारीले आयोजना गरेको पत्रकार सम्मेलनमा मन्त्री श्रेष्ठले समयमै नतिजा प्रकाशन गर्ने वातावरण निर्माण गर्न विश्वविद्यालयलाई आग्रह गरिन् । परीक्षा नियन्त्रण कार्यालयबाट सरल र सहज तरिकाले शैक्षिक प्रमाणपत्र प्राप्त गर्ने व्यवस्था मिलाउन पनि उनले पदाधिकारीलाई निर्देशन दिएकी थिइन् ।

तोकिएको समयमा परीक्षा सञ्चालन र नतिजा सार्वजनिक गर्न त्रिविलाई निर्देशन

पत्रकार सम्मेलनमा शिक्षामन्त्री श्रेष्ठले वार्षिक कार्यतालिका निर्धारण गरेर सोहीअनुसार परीक्षा सञ्चालन गर्न र नतिजा सार्वजनिक गर्न त्रिभुवन विश्वविद्यालयलाई निर्देशन दिएकी छन् । उनले वार्षिक कार्यतालिका निर्धारण गर्न र सोहीअनुसार काम गर्न निर्देशन दिएकी हुन् । त्रिविबाट समकक्षता लिने र ट्रान्सक्रिप्ट लिने लगायतका विषयलाई सहज बनाउन पनि विश्वविद्यालय प्रशासनलाई उनले निर्देशन दिइन् ।

रजिष्ट्रार केदार रिजालले असार भित्र रोकिएको सबै नतिजा प्रकाशन गरिसक्ने प्रतिबद्धता जनाए । परीक्षा नियन्त्रण कार्यालयलाई प्रविधिमैत्री बनाउँदै लगेर समयमै नतिजा प्रकाशन गर्ने उनको भनाई थियो ।

त्रिवि सुधारका लागि पाँच वटा समिति गठन
यसैविच त्रिभुवन विश्वविद्यालय सुधारका लागि विभिन्न पाँच वटा समिति गठन भएका छन् । त्रिविले प्रा.डा.नवराज कँडेलको संयोजकत्वमा जनशक्ति तथा दरबन्दी पुनरावलोकन एवं व्यवस्थापन समिति गठन गरेको छ । त्यस्तै प्रा.डा.भिमसेन देवकोटाको संयोजकत्वमा त्रिविको दृष्टिकोण २०३० र उपकुलपतिको सोचपत्रबिच तादात्म्यता मिलाई विश्वविद्यालयमा नीतिगत एकरूपता कायम गर्न सुझाव दिनेगरी समिति बनाइएको छ ।

त्यस्तै प्रा.डा. पुष्कर बज्राचार्यको संयोजकत्वमा पदाधिकारी नियुक्त गर्दा अपनाउनुपर्ने आधार र मापदण्ड तयार गरी सुझावसहितको प्रतिवेदन पेस गर्न भनिएको छ । नवनियुक्त उपकुलपति प्रा.डा.केशरजंग बरालले त्रिविमा देखिएका विविध समस्या समाधान गर्न समिति गठन गरेका हुन् ।

उत्तरपुस्तिका हराएको विषयमा अध्ययन गर्न पूर्व रजिस्ट्रार प्रा.डा.चन्द्रमणी पौडेलको संयोजकत्वमा उच्चस्तरीय समिति गठन गरिएको थियो । उक्त समितिले अध्ययन गरेर आफ्नो प्रतिवेदन त्रिविलाई बुझाइसकेको छ ।

त्रिवि आमसञ्चार विभागको प्रमुखमा प्रा.पोखरेल नियुक्त
यसैविच त्रिभुवन विश्वविद्यालयको पत्रकारिता तथा आमसञ्चार विभागको प्रमुखमा प्रा.प्रवलराज पोखरेल नियुक्त भएका छन् । विभागीय प्रमुख प्रा.चिरञ्जीवी खनालले दिएको राजीनामा स्वीकृत गरी विश्वविद्यालयका उपकुलपति प्रा.डा.केशरजङ्ग बरालले पोखरेललाई तीन महिनाका लागि विभागीय प्रमुखमा नियुक्त गरेका हुन् ।

पोखरेल करिब १६ वर्षअघि पनि पत्रकारिता विभागको प्रमुख थिए । विभागीय प्रमुखमा नियुक्त भएपछि प्रतिक्रिया दिँदै प्राध्यापक पोखरेलले पत्रकारिता शिक्षाको प्रवर्द्धन, प्राज्ञिक उन्नयन र अध्ययन अनुसन्धानमा सुधार गर्ने प्रतिबद्धता जनाएका छन् ।