काठमाडौं । स्वीकृति बिनाको विदेशी पुस्तक प्रयोग गर्ने विद्यालयलाई कारबाही गर्ने पाठ्यक्रम विकास केन्द्रले चेतावनी दिएको छ । केन्द्रले सूचना जारी गर्दै कानुनी व्यवस्था विपरीत पाठ्यक्रम विकास केन्द्रबाट स्वीकृत नभएका पाठ्यपुस्तक तथा विदेशी पाठ्यपुस्तक प्रयोग नगर्न नगराउन सबै विद्यालय तथा अभिभावकलाई आग्रह गर्दै चेतावनी दिएको हो ।

Advertisement 1

सबै स्थानीय सरकार एवं शिक्षा विकास तथा समन्वय इकाईलाई अनुगमन गर्न र अनुगमनको क्रममा कानुनी व्यवस्था विपरीत पाठ्यपुस्तक प्रयोग गरेको पाइएमा नियमानुसार कारबाही गर्न समेत अनुरोध गरेको छ । केही विद्यालयले कानुनी व्यवस्थाको प्रतिकूल हुने गरी स्वीकृत नभएका विदेशी पाठ्यपुस्तक प्रयोग गरिरहेको भन्ने विभिन्न सञ्चार माध्यमबाट प्रकाशित समाचार तथा अभिभावकको गुनासोले केन्द्रको गम्भीर ध्यानाकर्षण भएको सूचनामा उल्लेख गरेको छ ।

शिक्षा ऐनको दफा आठ र शिक्षा नियमावली, २०५९ को नियम ६ मा विद्यालयले स्वीकृत पाठ्यक्रम र पाठ्यसामग्री लागू गर्नुपर्ने कानुनी व्यवस्था छ । केन्द्रले गत चैत १६ गते सूचना जारी गर्दै सबै स्थानीय तहका सबै सामुदायिक तथा संस्थागत विद्यालयलाई पाठ्यक्रम विकास केन्द्रबाट स्वीकृति प्राप्त पाठ्यपुस्तक, पाठ्यसामग्री, सिकाई सामग्री मात्र प्रयोग गर्न गराउन सूचित गरिसकेको थियो ।