काठमाडौं । सरकारले एकै पटक ११ जना सचिवको सरुवा गरेको छ । बिहीवार बसेको मन्त्रिपरिषद् बैठकले विभिन्न मन्त्रालय, आयोग, कार्यालय तथा प्रदेश सरकारको मुख्यमन्त्री तथा मन्त्रिपरिषद कार्यालयका प्रदेश प्रमुख सचिव गरेर ११ जना सचिवको सरुवा गरेको हो ।

Advertisement 1

प्रधानमन्त्री कार्यालय स्रोतका अनुसार प्राकृतिक स्रोत तथा वित्त आयोगका सचिव कृष्णबहादुर राउतको उद्योग, वाणिज्य तथा आपूति मन्त्रालयमा उद्योग सचिवमा सरुवा हुदाँ त्यहाँ कार्यरत सचिव मुकुन्दप्रसाद निरौलाको उपराष्ट्रपति कार्यालयमा सरुवा भएको छ ।

उपराष्ट्रपति कार्यालयका सचिव मधुसूदन बुर्लाकोटीको स्वास्थ्य तथा जनसङ्ख्या मन्त्रालयमा (जनसंख्या तथा प्रशासन) सचिवमा सरुवा भएको छ । यस अघि स्वास्थ्य मन्त्रालयमा जनसंख्या तथा प्रशासन सचिवको जिम्मेवारीमा रहेकी देवकुमारी गुरागाई पाँच वर्षे सचिवको कार्यकाल पुरा गरेर अनिवार्य अवकाशमा गएपछि उक्त पद रिक्त भएको थियो । बुर्लाकोटी सहसचिवबाट सचिव भएपछि पहिलो पटक मन्त्रालयको सचिवको जिम्मेवारी पाएका हुन् ।

Advertisement 2

यसैगरी युवा तथा खेलकुद मन्त्रालयका सचिव रविलाल पन्थको निर्वाचन आयोगमा सरुवा भएको छ । निर्वाचन आयोगका सचिव सुर्यप्रसाद गौतम पनि सचिवको पाँच वर्षे अवधि पुरा गरेर अनिवार्य अवकाशमा गएपछि उक्त पद रिक्त भएको थियो ।

बागमती प्रदेश सरकारको प्रमुख सचिवको जिम्मेवारीमा रहेका घनश्याम उपाध्यायको श्रम, रोजगार तथा सामाजिक सुरक्षा मन्त्रालयको सचिवमा सरुवा भएको छ । श्रम मन्त्रालयका सचिव केवलप्रसाद भण्डारी पनि पाँच वर्षे सचिवको कार्यकाल पुरा गरेर अनिवार्य अवकाशमा गएपछि मन्त्रालयमा सचिव पद रिक्त रहेको थियो ।

मधेस प्रदेश सरकारका प्रमुख सचिव दिनेशकुमार घिमिरेको उद्योग, वाणिज्य तथा आपूति मन्त्रालयमा (वाणिज्य) सचिवमा सरुवा भएको छ भने उक्त जिम्मेवारीमा रहेका सचिव नारायणप्रसाद शर्माको प्रधानमन्त्री तथा मन्त्रिपरिषद्को कार्यालयमा सरुवा भएको छ ।

प्राविधिक मन्त्रालय अन्तरगत पनि भौतिक पूर्वाधार तथा यातायात मन्त्रालयका सचिव केशवकुमार शर्माको उर्जा, जलस्रोत तथा सिंचाई मन्त्रालयको उर्जा सचिवमा सरुवा हुदाँ त्यहाँ कार्यरत सचिव गोपालप्रसाद सिग्देलको भौतिक, पूर्वाधार तथा यातायात मन्त्रालयको सचिवमा सरुवा भएको छ ।

उर्जा, जलस्रोत तथा सिंचाई मन्त्रालयको जलस्रोत तथा सिँचाइ सचिवको जिम्मेवारीमा रहेका सुशीलचन्द्र तिवारीको जल तथा ऊर्जा आयोगको सचिवालयका सरुवा भएको छ भने त्यहाँ कार्यरत सचिव सरिता दवाडीको ऊर्जा, जलस्रोत तथा सिँचाइ मन्त्रालयको जलस्रोत तथा सिँचाइ सचिवमा सरुवा भएको छ ।

११ जना सचिवको सरुवा गर्दा मधेश प्रदेश र बागमती प्रदेश प्रमुख सचिवको पद भने खाली राखिएको छ । त्यहाँ कार्यरत प्रमुख सचिवलाई सिंहदरबारमा सरुवा गरे पनि प्रदेशमा पठाउने सचिवको पद खाली भएका कारण यस पटक दुबै प्रदेशको प्रमुख सचिवको पद रिक्त राखिएको हो ।

सम्भव त अब सहसचिवबाट सचिवमा बढुवा भएकालाई खाली रहेको दुई प्रदेशको प्रमुख सचिवमा पठाउने सरकारको तयारी छ ।