काठमाडौं । सरकारले अपाङ्गता भएका व्यक्तिको समस्या समाधानका गर्नका लागि पाँच सदस्यीय कार्यदल गठन गरेको छ । महिला, बालबालिका तथा ज्येष्ठ नागरिक मन्त्रालयले मन्त्रालयमा कार्यरत समाज कल्याण तथा संघसंस्था समन्वय महाशाखा प्रमुख सहसचिव रामकृष्ण लामिछानेको संयोजकत्वमा पीडितकोसमेत प्रतिनिधित्व रहनेगरी कार्यदल गठन गरेको हो ।

Advertisement 1

कार्यदललाई अपाङ्गता भएका व्यक्तिको समस्या समाधानका लागि आवश्यक मापदण्ड बनाउन दुई हप्ताको समयावधि दिइएको महिला, बालबालिका तथा ज्येष्ठ नागरिकमन्त्री भगवती चौधरीले जानकारी दिईन । उनले भनिन्, ‘यहाँ हाम्रो सम्बन्धित महाशाखाको सहसचिव हुनुहुन्छ रामकृष्ण लामिछाने । उहाँको संयोजकत्वमा अपाङ्गता महासङ्घका अध्यक्ष राम कार्की, पीडितको पक्षबाट स्वयम दीपक भण्डारी, जो धर्ना बस्नु भएको थियो । तीन सदस्यीय कार्यदल बनाउन मैले निर्देशन दिएको थियो । त्यो निर्देशन अनुसार उहाँहरूले छलफल गर्दाखेरी त्यसलाई पाँच सदस्यीय बनाइएको छ । जस अनुसार उनीहरूलाई सहायता सामग्री आवश्यकता अनुसार उपलब्ध गराइने, पूर्णरुपमा असक्त भएकालाई सहयोगीको व्यवस्था गर्ने लगायतका विषयमा सुझाव दिनेछ ।’

अपाङ्गता भएका दीपक भण्डारीले काठमाडौँमा सहयोगीको माग गर्दै धर्ना दिँदै आएका थिए । उनीसहित अन्य उस्तै व्यक्तिका समस्या समाधान हुनेगरी मापदण्ड बनाउन कार्यदल गठन गरिएको मन्त्री चौधरीले बताइन् । कार्यदलले दिएको सुझावको आधारमा मापदण्ड बनाई कार्यान्वयनका लागि स्थानीय तहलाई परिपत्र गर्ने मन्त्रालयले जनाएको छ ।